ନୂଆଦିଲ୍ଲୀ : ଇଂଲଣ୍ଡର ମଞ୍ଚେଷ୍ଟରରେ ମଙ୍ଗଳବାର ହୋଇଥିବା ବିଶ୍ବକପ କ୍ରିକେଟର ପ୍ରଥମ ସେମିଫାଇନାଲ ମ୍ୟାଚରେ ଭାରତ ନ୍ୟୁଜିଲାଣ୍ଡ ଠାରୁ ପରାସ୍ତ ହୋଇଥିଲା। ନ୍ୟୁଜିଲାଣ୍ଡ ବିପକ୍ଷ ସେମିଫାଇନାଲରେ ଭାରତ ପରାଜିତ ହୋଇଥିଲେ ମଧ୍ୟ ମହେନ୍ଦ୍ର ସିଂହ ଧୋନୀ ଲଢ଼ୁଆ ଅର୍ଦ୍ଧଶତକ କରିଥିଲେ। ଭାରତକୁ ବିଜୟ ଦ୍ବାର ଦେଶରେ ପହଞ୍ଚାଇ ଦେଇଥିଲେ ଧୋନି। ହେଲେ ଦୁର୍ଭାଗ୍ୟ ଜନକ ଭାବେ ରନ୍ ଆଉଟ୍ ହୋଇ ଯାଇଥିଲେ। ଶେଷ ବିଶ୍ବକପ୍ ହୋଇଥିବାରୁ ସର୍ବଦା ଶାନ୍ତ ଏବଂ ନିୟନ୍ତ୍ରଣରେ ରହୁଥିବା ଧୋନୀ ଭାବବିହ୍ବଳ ହୋଇ ପଡ଼ିଆ ଛାଡ଼ିଥିଲେ। ସେ ଯେ କେତେ ଦୁଃଖିତ ଥିଲେ, ତାହା ତାଙ୍କ ମୁଖମଣ୍ଡଳରୁ ସ୍ପଷ୍ଟ ବାରି ହୋଇ ଯାଉଥିଲା। ଧୋନୀ କାନ୍ଦ କାନ୍ଦ ହୋଇ ପ୍ୟାଭିଲିୟନ ଫେରିଥିଲେ, ତାଙ୍କ ସହ ୧୩୩ କୋଟି ଭାରତୀୟ ମଧ୍ୟ କାନ୍ଦି ଉଠିଥିଲେ। ଏହି ସମୟର ଆଉଏକ ଭାବବିହ୍ବଳ ଦୃଶ୍ୟ ଏବେ ସାମାଜିକ ଗଣମାଧ୍ୟମରେ ଦେଖିବାକୁ ମିଳିଛି। ଧୋନୀ ଆଉଟ ହେବାମାତ୍ରେ ସେଠାରେ ଉପସ୍ଥିତ ଥିବା ଜଣେ କ୍ୟାମେରାମ୍ୟାନ ଭାବବିହ୍ବଳ ହୋଇପଡ଼ିଥିଲେ। ଏପରିକି ସେ ନିଜକୁ ଆୟତ୍ତ କରିନପାରି କାନ୍ଦି ପକାଇଥିଲେ। ଏହାର ଏକ ଫଟୋ ଏବେ ଜାତୀୟ ଗଣମାଧ୍ୟମରେ ଭାଇରାଲ ହେବାରେ ଲାଗିଛି।
