ଭୁବନେଶ୍ବର : କଳିଙ୍ଗ ଷ୍ଟାଡ଼ିୟମ ହକି କମ୍ପେ୍ଲକ୍ସରେ ଚାଲିଥିବା ଏଫ୍ଆଇଏଚ୍ ହକି ସିରିଜ୍ ଫାଇନାଲ୍ସର ଶୁକ୍ରବାର ୨ଟି ସେମିଫାଇନାଲ ସମେତ ୫ମ ଓ ୬ଷ୍ଠ ସ୍ଥାନ ପାଇଁ ମ୍ୟାଚ ଖେଳାଯିବ । ସକାଳ ୮ଟାରେ ରୁଷିଆ ଓ ପୋଲାଣ୍ଡ ମଧ୍ୟରେ ୫ମ ଓ ୬ଷ୍ଠ ସ୍ଥାନ ପାଇଁ ମ୍ୟାଚ୍ ଏବଂ ଅପରାହ୍ଣ ୫ଟାରେ ପ୍ରଥମ ସେମିଫାଇନାଲ ଆମେରିକା ଓ ଦକ୍ଷିଣ ଆଫ୍ରିକା ମଧ୍ୟରେ ଏବଂ ୭ଟା ୧୫ରେ ଭାରତ ଓ ଜାପାନ ମଧ୍ୟରେ ଖେଳାଯିବ। ଏଫ୍ଆଇଏଚ୍ ସିରିଜ୍ ଫାଇନାଲ୍ସରୁ ଶ୍ରେଷ୍ଠ ୨ ଦଳ ନଭେମ୍ବରରେ ଆୟୋଜିତ ହେବାକୁ ଥିବା ଅଲିମ୍ପିକ୍ ଯୋଗ୍ୟତା ପର୍ଯ୍ୟାୟରେ ଖେଳିବା ଲାଗି ଯୋଗ୍ୟତା ଅର୍ଜନ କରିବାର ଥିବାରୁ ସେମିଫାଇନାଲ ମ୍ୟାଚ ଭାରତ, ଦକ୍ଷିଣ ଆଫ୍ରିକା ଓ ଆମେରିକା ପାଇଁ ବେଶ ଗୁରୁତ୍ବପୂର୍ଣ୍ଣ । ଜାପାନ ଅଲିମ୍ପିକ୍ ଆୟୋଜକ ଦେଶ ଭାବେ ଯୋଗ୍ୟତା ଅର୍ଜନ କରିଥିବାରୁ ସେମିଫାଇନାଲ ବିନା ଚାପରେ ଖେଳିବ।
ଭାରତ ତରଫରୁ ଆକାଶଦୀପ ସିଂହ ୫ଟି, ହରମନପ୍ରୀତ୍ ସିଂହ ୩ଟି, ମନପ୍ରୀତ ସିଂହ ଓ ଅମିତ ରୋହିଦାସ ୨ଟି ଲେଖାଏଁ ଗୋଲ ସ୍କୋର କରିଛନ୍ତି। ଦଳ ଜାପାନକୁ ପରାସ୍ତକରି ଫାଇନାଲ ଖେଳିବା ଲକ୍ଷ୍ୟେର ରହିଛି। ସେହିଭଳି ଆମେରିକା ଓ ଦକ୍ଷିଣ ଆଫ୍ରିକା ଉଭୟ ଦଳ ମଧ୍ୟ ସେମିଫାଇନାଲରେ ବିଜୟ ସହ ଫାଇନାଲକୁ ପ୍ରବେଶ କରିବା ଲକ୍ଷ୍ୟ ରଖିଛନ୍ତି। ଆମେରିକା ଲିଗ୍ ପର୍ଯ୍ୟାୟରେ ଅପରାଜୟ ରହିବା ସହ ସିଧାସଳଖ ସେମିଫାଇନାଲକୁ ଉନ୍ନୀତ ହୋଇଛି। ଅନ୍ୟପକ୍ଷରେ ଦକ୍ଷିଣ ଆଫ୍ରିକା ପ୍ରାରମ୍ଭରୁ ଖରାପ ପ୍ରଦର୍ଶନ କରିଥିବା ବେଳେ ଦୃଢତାର ସହିତ ପ୍ରତ୍ୟାବର୍ତ୍ତନ କରି ସେମିଫାଇନାଲରେ ପହଞ୍ଚିଛି।
ଫାଇନାଲ ପ୍ରଥମ ଲକ୍ଷ୍ୟ: ମନପ୍ରୀତ୍
ଲିଗ୍ରେ ଆମେ ଭଲ ପ୍ରଦର୍ଶନ କରି ସିଧାସଳଖ ସେମିଫାଇନାଲକୁ ଉନ୍ନୀତ ହୋଇଛୁ। ଦଳର ସମସ୍ତ ଖେଳାଳି ଭଲ ପ୍ରଦର୍ଶନ କରୁଛନ୍ତି। ଜାପାନ ବିପକ୍ଷ ସେମିଫାଇନାଲ ମ୍ୟାଚ ଆମ ପାଇଁ ବଡ ଚ୍ୟାଲେଞ୍ଜ। ଅଲିମ୍ପିକ୍ ଯୋଗ୍ୟତା ପର୍ଯ୍ୟାୟ ଲାଗି ଯୋଗ୍ୟତା ଅର୍ଜନ ପାଇଁ ଆମକୁ ଫାଇନାଲରେ ପ୍ରବେଶ କରିବାକୁ ପଡ଼ିବ। ଏଥିପାଇଁ ପୂରା ଦଳ ପ୍ରସ୍ତୁତ ବୋଲି ଭାରତୀୟ ଦଳର ଅଧିନାୟକ ମନପ୍ରୀତ ସିଂହ କହିଛନ୍ତି। ଜାପାନ ଭଲ ପ୍ରଦର୍ଶନ କରୁଛି। ଉକ୍ତ ଦଳକୁ ଆମେ ହାଲ୍କା ଭାବେ ନେଉନାହୁଁ। ମ୍ୟାଚକୁ ଜିତିବାକୁ ଆମେ ଶତ ପ୍ରତିଶତ ଉଦ୍ୟମ କରିବୁ ବୋଲି ମନପ୍ରୀତ କହିଛନ୍ତି।
