ନୂଆଦିଲ୍ଲୀ: କାର୍ଯ୍ୟାଳୟରେ ବସିବା ସ୍ଥାନ ପରିବର୍ତ୍ତନକୁ ବିରୋଧ କରିବା, କର୍ମଚାରୀ ସଙ୍ଘ ଅଧ୍ୟକ୍ଷଙ୍କୁ ବସିବା ସ୍ଥାନ ପରିବର୍ତନ ନେଇ ଅଭିଯୋଗ କରିବା ଏବଂ ଅଧା ଦିନ ଡ଼ିଉଟିରୁ ଅନୁପସ୍ଥିତ ରହି ପିଲାଙ୍କୁ ସ୍କୁଲ ସମାରୋହକୁ ନେବା ଭଳି କାର୍ଯ୍ୟକୁ ଆଧାର କରି ଜଣେ କର୍ମଚାରୀଙ୍କୁ କାର୍ଯ୍ୟରୁ ବହିଷ୍କାର କରିବା କେତେ ଯଥାର୍ଥ, ସେ ନେଇ ପ୍ରଶ୍ନ ଉଠିଛି। ଏଭଳି ଅଭିଯୋଗରେ ସର୍ବୋଚ୍ଚ ନ୍ୟାୟାଳୟରେ ଜୁନିଅର କୋର୍ଟ ଆସିଷ୍ଟାଣ୍ଟ ଭାବେ କାର୍ଯ୍ୟ କରୁଥିବା ଜଣେ କର୍ମଚାରୀଙ୍କୁ ୨୦୧୮ ଡିସେମ୍ବର ୨୧ରେ ବହିଷ୍କାର କରାଯାଇଥିଲା ଏବଂ ସେହି କର୍ମଚାରୀ ଏବେ ପ୍ରଧାନ ବିଚାରପତିଙ୍କ ବିରୁଦ୍ଧରେ ଯୌନ ଉତ୍ପୀଡ଼ନ ଅଭିଯୋଗ ଆଣିଛନ୍ତି।
ସମ୍ପୃକ୍ତ କର୍ମଚାରୀ ସୁପ୍ରିମକୋର୍ଟରେ ୨୦୧୪ ମସିହା ମେ ମାସରୁ କାର୍ଯ୍ୟ ଆରମ୍ଭ କରିଥିଲେ ଏବଂ ତାଙ୍କ ପ୍ରଥମ ବାର୍ଷିକ ଗୁପ୍ତ ଚରିତ୍ର ପଞ୍ଜିକାରେ ‘ଗୁଡ଼’ ଲେଖା ଯାଇଥିବା ବେଳେ ପରବର୍ତ୍ତୀ ବର୍ଷ ‘ଭେରୀ ଗୁଡ଼’ ଲେଖା ଯାଇଛି।
୨୦୧୮ ଅଗଷ୍ଟରୁ ନଭେମ୍ବର ମଧ୍ୟରେ ତାଙ୍କୁ ୩ଥର ବଦଳି କରାଯାଇଥିଲା। ପ୍ରଥମେ ୨୦୧୮ ଅଗଷ୍ଟରେ ପ୍ରଧାନ ବିଚାରପତିଙ୍କ ଆବାସ ସ୍ଥାନରେ, ଅକ୍ଟୋବରରେ ସିପିଆରରେ ଏବଂ ନଭେମ୍ବରରେ ସୁପ୍ରିମକୋର୍ଟ ପାଠାଗାରରେ କାର୍ଯ୍ୟ କଲାପରେ କାର୍ଯ୍ୟରୁ ବହିଷ୍କାର କରାଯାଇଥିଲା।
