ନୂଆଦିଲ୍ଲୀ: ନିଜ ୩ବର୍ଷର ଝିଅକୁ ବାପା ଖାଦ୍ୟ ଦେବା ବଦଳରେ କ୍ଷୀର ବୋତଲରେ ମଦ ଭର୍ତ୍ତି କରି ଦେଉଥିଲେ। ପିଲାଟି ତାକୁ ପିଇ ଶୋଇ ପଡୁଥିଲା। ପରେ ବାପା ନିଜ କାମରେ ବାହାରକୁ ଯାଉଥିଲେ। ଏପରି ଏକ ଦୁଃଖଦ ଘଟଣା ଦେଖିବାକୁ ମିଳିଛି ରାଜଧାନୀ ନୂଆଦିଲ୍ଲୀରେ। ମହିଳା କମିଶନ ଅଭିଯୋଗ ପାଇବା ପରେ ପିଲାଟିକୁ ଉଦ୍ଧାର କରିଛନ୍ତି।
ସୂଚନା ମୁତାବକ, ଦିଲ୍ଲୀର ପ୍ରେମନଗର ଅଞ୍ଚଳରେ ୩ବର୍ଷର ଝିଅ ସହ ଉକ୍ତ ବ୍ୟକ୍ତି ରୁହନ୍ତି। ବର୍ଷକ ତଳେ ତାଙ୍କ ସ୍ତ୍ରୀଙ୍କ ମୃତ୍ୟୁ ଘଟିଛି। ଏହା ପରଠାରୁ ସେ ତାଙ୍କ ଝିଅର ଲାଳନପାଳନ ଠିକ୍ ଭାବେ କରୁ ନ ଥିବା ପଡ଼ୋଶୀମାନେ କହିଛନ୍ତି। ସେ ସବୁବେଳେ ମଦ ପିଇ ଘରେ ନିଶାଶକ୍ତ ଅବସ୍ଥାରେ ପଡ଼ିରୁହନ୍ତି। ୩ଦିନ ହେବ ଝିଅଟି ଭୋକିଲା ଥିଲେ ହେଁ ତାର ବାପା କିଛି ଖାଇବାକୁ ଦେଉ ନ ଥିଲେ। ପିଲାଟି କାନ୍ଦିବାରୁ ପଡୋଶୀମାନେ ତା’ କଥା ବୁଝିବାକୁ ଆସୁଥିଲେ ମଧ୍ୟ ତା’ର ବାପା ସେମାନଙ୍କୁ ବାରଣ କରୁଥିଲା। ଏପରି କି କ୍ଷୀର ବୋତଲରେ ପିଲାଟିକୁ ମଦ ଭର୍ତ୍ତି କରି ପିଇବାକୁ ଦେଉଥିଲେ। ପଡୋଶୀମାନେ ଏହା ଦେଖି ମହିଳା ହେଲ୍ପଲାଇନକୁ ଫୋନ କରି ଅଭିଯୋଗ ଜଣାଇଥିଲେ। ମହିଳା କମିଶନଙ୍କ ଟିମ୍ ସେଠାରେ ପହଞ୍ଚି ପିଲାଟିକୁ ଉଦ୍ଧାର କରିଥିଲେ। ସେତେବେଳେ ପିଲାଟି ବହୁତ ଦୁର୍ବଳ ଥିଲା ଏବଂ ଶରୀରରେ କିଛି ସଂକ୍ରମଣ ହୋଇଥିବା ଦେଖିବାକୁ ମିଳିଥିଲା। ପିଲାଟିର ବାପା ନିଶାସକ୍ତ ଅବସ୍ଥାରେ ଘରେ ଶୋଇ ରହିଥିଲେ। ଘର ଭିତରେ ଅନେକ ମଦ ବୋତଲ ପଡ଼ି ରହିଥିଲା। ପିଲାଟିକୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି।
