ଆଇପିଏଲରେ ଜୋସେଫଙ୍କ ସର୍ବଶ୍ରେଷ୍ଠ ବୋଲିଂ ପ୍ରଦର୍ଶନ: ୪୦ରନରେ ଜିତିଲା ମୁମ୍ବାଇ ଇଣ୍ଡିଆନ୍ସ

ନୂଆଦିଲ୍ଲୀ: ଅଲଜ୍ଜାରି ଜୋସେଫଙ୍କ ୬ ଉଇକେଟ ଏବଂ ପୋଲାର୍ଡଙ୍କ ୪୬ ରନ ବଳରେ ମୁମ୍ବାଇ ଇଣ୍ଡିଆନ୍ସ ଟି-୨୦ ଲିଗର ୧୯ତମ ମ୍ୟାଚରେ ହାଇଦରାବାଦକୁ ୪୦ ରନରେ ପରାସ୍ତ କରିଛି। ଏଥି ସହିତ ମୁମ୍ବାଇ ଇଣ୍ଡିଆନ୍ସ ଚଳିତ ସିଜିନର ତୃତୀୟ ମ୍ୟାଚ ହାତେଇ ନେଇଛି। ପ୍ରଥମେ ଟସ ଜିତି ମୁମ୍ବାଇ ନିର୍ଦ୍ଧାରିତ ୨୦ ଓଭରରେ ୭ ଉଇକେଟ ହରାଇ ୧୩୬ ରନ ସଂଗ୍ରହ କରିଥିଲା। ଏହାର ଜବାବରେ ହାଇଦରାବାଦ ୧୭.୪ ଓଭରରେ ସମସ୍ତ ଉଇକେଟ ହରାଇ ମାତ୍ର ୯୬ ରନ ସଂଗ୍ରହ କରିବାକୁ ସକ୍ଷମ ହୋଇଥିଲେ। ଚଳିତ ସିଜିନରେ ହାଇଦରାବାଦର ଏହା ଦ୍ଵିତୀୟ ହାର।ସର୍ବଶ୍ରେଷ୍ଠ ବୋଲିଂ ପ୍ରଦର୍ଶନ କରି ବୋଲର ଅଲଜ୍ଜାରି ଜୋସେଫ ପ୍ରଥମ ବୋଲର ଭାବେ ୩.୪ ଓଭରରେ ୧୨ ରନ ବଦଳରେ ୬ ଉଇକେଟ ଅକ୍ତିଆର କରିଛନ୍ତି। ଏହା ପୂର୍ବରୁ ଆଣ୍ଡ୍ରୟୁ ଟାଇ ୧୭ରନ ବଦଳରେ ୫ ଉଇକେଟ ନେଇଥିଲେ। ଜୋସେଫଙ୍କୁ ମ୍ୟାନ ଅଫ ଦ ମ୍ୟାଚ ଘୋଷଣା କରାଯାଇଛି।