ଶ୍ରୀନଗର : ଆତଙ୍କବାଦୀ କାର୍ଯ୍ୟ ଅଭିଯୋଗରେ ଗିରଫ ହୋଇଥିବା ଜଣେ ସ୍କୁଲ ଶିକ୍ଷକଙ୍କର ସୋମବାର ରାତିରେ ହାଜତରେ ମୃତ୍ୟୁ ହୋଇଛି। ମୃତ ଶିକ୍ଷକ ହେଉଛନ୍ତି ଜାମ୍ମୁ-କାଶ୍ମୀର ପୁଲୱାମା ଜିଲା ଅବନ୍ତୀପୁରର ରିଜୱାନ ପଣ୍ଡିତ (୨୮)। ଶିକ୍ଷକଙ୍କ ହାଜତ ମୃତ୍ୟୁକୁ ନେଇ ପୁଲୱାମା ସହରରେ ବିକ୍ଷୋଭ ପ୍ରଦର୍ଶନ କରାଯାଇଛି। ରାଜ୍ୟ ସରକାର ଏହାର ବିଚାର ବିଭାଗୀୟ ତଦନ୍ତ ନିର୍ଦେଶ ଦେଇଛନ୍ତି। ପୁଲିସର ଅନୁରୋଧ କ୍ରମେ ସାଧାରଣ ପ୍ରଶାସନ ବିଭାଗ ସିଆରପିସି ଧାରା ୧୭୬ ଅନୁଯାୟୀ ବିଚାର ବିଭାଗୀୟ ତଦନ୍ତ ନିର୍ଦେଶ ଦେଇଛି। ଶିକ୍ଷକଙ୍କ ମୃତ୍ୟୁ ଖବର ପ୍ରଚାରିତ ହେବା ମାତ୍ରେ ଅବନ୍ତୀପୁର ଅଞ୍ଚଳରେ ବିକ୍ଷୋଭ ଦେଖାଯାଇଥିଲା। ବିକ୍ଷୋଭକାରୀମାନେ ସୁରକ୍ଷାକର୍ମୀଙ୍କ ଉପରକୁ ଟେକା, ପଥର ମାଡ କରିଥିଲେ। ନ୍ୟାସନାଲ କନଫରେନ୍ସ ଉପାଧ୍ୟକ୍ଷ ଓମାର ଅବଦୁଲ୍ଲା ଏହି ଘଟଣାକୁ ନିନ୍ଦା କରିବା ସହିତ ଦୋଷୀଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି। ସେହିପରି ପିଡିପି ମୁଖ୍ୟ ମେହବୁବା ମୁଫତି ଘଟଣାକୁ ନିନ୍ଦା କରିଛନ୍ତି। ମେହବୁବା କହିଛନ୍ତି ଯେ କେନ୍ଦ୍ର ସରକାରଙ୍କ ଦମନଲୀଳା ଯୋଗୁଁ ସାଧାରଣ ଲୋକଙ୍କ ଜୀବନ ଦୁର୍ବିସହ ହୋଇପଡିଛି। ନିରୀହ ଲୋକଙ୍କୁ ଜେରା ନିମନ୍ତେ ଘରୁ ଉଠାଇ ନିଆଯାଉଛି। ଫେରିଲା ବେଳକୁ ସେମାନଙ୍କ କଫିନ ଫେରୁଛି। ଦଳର ଅନ୍ୟତମ ନେତା ନଇମ ଅଖତାର କହିଛନ୍ତି ଯେ ରାଜ୍ୟପାଳ ସତ୍ୟପାଲ ମଲିକ ଏହା ଉପରେ ସ୍ପଷ୍ଟୀକରଣ ଦେବା ଦରକାର।
