ନୂଆଦିଲ୍ଲୀ: ୟୁରୋପୀୟ ସଂଘ ସହ ରାଜିନାମାରୁ ଓହରିଯିବା ପାଇଁ ବ୍ରିଟେନ୍ ପ୍ରଧାନମନ୍ତ୍ରୀ ଥେରେସା ମେ’ଙ୍କ ପ୍ରସ୍ତାବ ଦ୍ୱିତୀୟ ଥର ପାଇଁ ୧୪୯ ଭୋଟରେ କାଟ୍ ଖାଇଯାଇଛି। ହାଉସ୍ ଅଫ୍ କମନ୍ସରେ ଏହି ପ୍ରସ୍ତାବ ସପକ୍ଷରେ ୨୪୨ଟି ଭୋଟ୍ ମିଳିଥିବା ବେଳେ ବିପକ୍ଷରେ ୩୯୧ଟି ଭୋଟ୍ ପଡ଼ିଛି। ମେ’ଙ୍କ ରାଜିନାମାକୁ ପ୍ରତ୍ୟାଖ୍ୟାନ କରିବା ନିଷ୍ପତ୍ତି ବିରୁଦ୍ଧରେ କଞ୍ଜରଭେଟିବ୍ ପାର୍ଟିର ୭୫ ଜଣ ସାଂସଦ ବିଦ୍ରୋହ କରିଥିବାବେଳେ ଲେବର ପାର୍ଟିର ତିନି ଜଣ ସାଂସଦ ପାର୍ଟିର ନେତାମାନଙ୍କ ବିରୁଦ୍ଧରେ ବିଦ୍ରୋହ ପ୍ରକାଶ କରିଛନ୍ତି। ଏହା ଫଳରେ ବର୍ତ୍ତମାନ ବ୍ରିଟେନରେ ଅସ୍ଥିର ପରିସ୍ଥିତି ସୃଷ୍ଟି ହୋଇଛି। ୟୁରୋପୀୟ ସଂଘରୁ ଓହରିଯିବା ପାଇଁ ବ୍ରିଟେନ୍ ପାଇଁ ମାତ୍ର ଦୁଇ ସପ୍ତାହ ସମୟ ରହିଥିବା ବେଳେ ଏଭଳି ଘଟଣା ସାରା ପରିସ୍ଥିତିକୁ ଓଲଟପାଲଟ କରିଦେଇଛି। ପରାଜୟ ପରେ ପାର୍ଲାମେଣ୍ଟରେ ଉଦବୋଧନ ଦେଲାବେଳେ ଥେରେସା ମେ’ କହିଛନ୍ତି, ସାଂସଦମାନଙ୍କର ଏହି ନିଷ୍ପତ୍ତି ଅତ୍ୟନ୍ତ ଦୁର୍ଭାଗ୍ୟ ଜନକ। ସେ କହିଛନ୍ତି, ବିନା ରାଜିନାମାରେ ୟୁରୋପୀୟ ସଂଘରୁ ଓହରିଯିବା ଦ୍ୱାରା ବଡ଼ ଧରଣର କ୍ଷତିଘଟିବା କଥା ସେ ଜାଣନ୍ତି ତେଣୁ ବର୍ତ୍ତମାନ ସାଂସଦମାନେ ଆଗକୁ କ’ଣ ପଦକ୍ଷେପ ନେବେ ତାହା ସେମାନଙ୍କ ଉପରେ ନିର୍ଭର କରୁଛି। ଥେରେସା ମେ’ଙ୍କ ବ୍ରେକ୍ସିଟ୍ ରାଜିନାମା ବର୍ତ୍ତମାନ ଅକାମି ବୋଲି ଘୋଷଣା କରି ବିରୋଧୀ ଦଳ ନେତା ଜେରେମି କରବିନ୍ କୋହଳ ବ୍ରେକ୍ସିଟ୍ ପ୍ରସ୍ତାବ ଗୃହିତ କରିବା ପାଇଁ ମତ ଦେଇଛନ୍ତି। ସେ କହିଛନ୍ତି ବର୍ତ୍ତମାନ ପ୍ରଧାନମନ୍ତ୍ରୀ ସାଧାରଣ ନିର୍ବାଚନ ପାଇଁ ଘୋଷଣା କରନ୍ତୁ। ବିନା ରାଜିନାମାରେ ୟୁରୋପୀୟ ସଂଘରୁ ଓହରି ଯିବା ପ୍ରସ୍ତାବ ଉପରେ ଆଜି ସାଂସଦମାନେ ଭୋଟ୍ ଦେବେ।