ଭୁବନେଶ୍ୱର,୧୦/୧: କୋରାପୁଟ ଜିଲ୍ଲାର ପ୍ରାକୃତିକ ପରିବେଶ ସବୁ ସମୟରେ ଫିଲ୍ମ ସୁଟିଂ ଲାଗି ନିର୍ଦ୍ଦେଶକ ଓ ନିର୍ମାତାଙ୍କୁ ଆକୃଷ୍ଟ କରି ଆସିଛି । ଆଗରୁ ଏଠାରେ ଓଡ଼ିଆ ଫିଲ୍ମ ସୁଟିଂ ହେଉଥିଲା । ବର୍ତ୍ତମାନ ଦକ୍ଷିଣ ଭାରତୀୟ ଫିଲ୍ମ(ତେଲୁଗୁ ଓ ତାମିଲ)ସୁଟିଂ ପାଇଁ କୋରାପୁଟ ଜିଲ୍ଲାରେ ନିର୍ମାତା, ନିର୍ଦ୍ଦେଶକ, କଳାକାରଙ୍କ ଭିଡ଼ ଜମୁଛି । ନିକଟରେ ପ୍ରଖ୍ୟାତ ଫିଲ୍ମ ନିର୍ଦ୍ଦେଶକ ଏସଏସ ରାଜାମୌଲି ତାଙ୍କର ଏକ ହାଇ ବଜେଟର ଫିଲ୍ମ ଏସଏସବିଏମ ୨୯ ସୁଟିଂ ପାଇଁ ଡେରା ପକାଇଥିଲେ । ତାଙ୍କ ସହିତ ଅଭିନେତା ମହେଶ ବାବୁ ଓ ଅଭିନେତ୍ରୀ ପ୍ରିୟଙ୍କା ଚୋପ୍ରା ମଧ୍ୟ କୋରାପୁଟ ଆସିଥିଲେ । ଯାହା ଚର୍ଚ୍ଚାର ବିଷୟ ପାଲଟିଥିଲା । ବର୍ତ୍ତମାନ ନକ୍ସଲଙ୍କ ଜୀବନଧାରା ଉପରେ ତେଲୁଗୁ ଫିଲ୍ମ ‘କମ୍ରେଡ କଲ୍ୟାଣ’ର ସୁଟିଂ ଚାଲିଛି । ଫିଲ୍ମରେ ମୁଖ୍ୟ ଅଭିନେତା ଓ ଅଭିନେତ୍ରୀଙ୍କ ସହିତ କେତେକ ସିନ୍ରେ ସ୍ଥାନୀୟ ଯୁବକ ଯୁବତୀଙ୍କୁ ଅଭିନୟର ସୁଯୋଗ ଦେଉଛି ଫିଲ୍ମ ପ୍ରଯୋଜନା ସଂସ୍ଥା । ଦକ୍ଷିଣୀ ଫିଲ୍ମ ଇଣ୍ଡଷ୍ଟ୍ରି କୋରାପୁଟକୁ ଫିଲ୍ମ ସୁଟିଂ ପାଇଁ ଗୁରୁତ୍ୱ ଦେବା ଜିଲ୍ଲାକୁ ଏକ ସ୍ୱତନ୍ତ୍ର ପରିଚୟ ଦେଉଛି ।
ଦେଓମାଳି, ତଳମାଳି, କାଳିଆମାଳି, ଜୟପୁର, ସେମିଳିଗୁଡ଼ା, କୋରାପୁଟ ଜଗନ୍ନାଥ ମନ୍ଦିର, ଡୁଡୁମା ଆଦି ବିଭିନ୍ନ ସ୍ଥାନରେ ଏହି ଫିଲ୍ମ କମ୍ରେଡ କଲ୍ୟାଣର ସୁଟିଂ ଚାଳିଛି । ଏହି ଫିଲ୍ମର ନିର୍ଦ୍ଦେଶକ ଜାନକୀ ରାମ ମାରେଲା, ନିର୍ମାତା ଭେଙ୍କଟ କ୍ରିଷ୍ଣା ରହିଥିବା ବେଳେ ମୁଖ୍ୟ ଚରିତ୍ର ତଥା ନାୟକ ଭାବେ ତେଲଗୁ ଷ୍ଟାର ଶ୍ରୀବିଷ୍ଣୁ ଓ ନାୟିକା ଭାବେ ମାଲାୟଲମ ଅଭିନେତ୍ରୀ ମହିମା ନାମ୍ବିଆର ଅଭିନୟ କରୁଛନ୍ତି । ନକ୍ସଲଙ୍କ ଜୀବନ ଉପରେ ଆଧାରିତ ଏହି ଫିଲ୍ମ କାଳିଆ ମାଳି, ଦୁଧାରୀ ଓ କୋରାପୁଟ ଜଗନ୍ନାଥ ମନ୍ଦିର ଠାରେ ସୁଟିଂ ହୋଇ ସାରିଛି । ଆଗକୁ ପ୍ରାୟ ୧୦/୧୨ ଦିନ ଧରି ଜିଲ୍ଲାର ବିଭିନ୍ନ ସ୍ଥାନରେ ସୁଟିଂ ହେବ ବୋଲି ପ୍ରଯୋଜନା ସଂସ୍ଥାକୁ ସହଯୋଗ କରୁଥିବା ସେମିଳିଗୁଡ଼ାର ଯୁବକ ଗୌତମ କହିଛନ୍ତି । ଫିଲ୍ମରେ ଅଭିନୟ ପାଇଁ ସୁଯୋଗ ପାଇଥିବା ସ୍ଥାନୀୟ ଅଞ୍ଚଳର ମହିଳା ପିଙ୍କି ଦାସ କହିଛନ୍ତି ଯେ ଅଭିନୟର ସୁଯୋଗ ପାଇ ସେ ବହୁତ ଉତ୍ସାହିତ। ଫିଲ୍ମରେ ସ୍ଥାନୀୟ କଳାକାରଙ୍କୁ ସୁଯୋଗ ମିଳୁଛି ଏବଂ ସ୍ଥାନୀୟ ଲୋକଙ୍କୁ ରୋଜଗାର ମଧ୍ୟ ମିଳୁଛି
