ଜାମ୍ମୁ: ଜାମ୍ମୁ-କାଶ୍ମୀରର ହଣ୍ଡୱାରାରେ ଲଗାତାର ୩ଦିନ ଧରି ଚାଲିଛି ଏନକାଉଣ୍ଟର। ଆତଙ୍କବାଦୀଙ୍କ ସହ ଗୁଳିବିନିମୟ ବେଳେ ୩ ଜଣ ସିଆରପିଏଫ ଯବାନ ଏବଂ ୨ ପୁଲିସ କର୍ମଚାରୀ ସହିଦ ହୋଇଛନ୍ତି। ଏଥିରେ ୨ ଜଣ ଆତଙ୍କବାଦୀ ନିହତ ହୋଇଥିବା ସୂଚନା ମିଳିଛି। କିନ୍ତୁ ସେମାନଙ୍କ ମୃତଦେହ ଏଯାଏ ମିଳିପାରି ନାହିଁ। ରବିବାର ସକାଳେ କିଛି ସମୟ ପାଇଁ ଗୁଳିବିନିମୟ ବନ୍ଦ ହେବା ପରେ ସୁରକ୍ଷା ବଳଙ୍କ ପକ୍ଷରୁ ସମ୍ପୃକ୍ତ ଅଞ୍ଚଳରେ ସର୍ଚ୍ଚ ଅପରେଶନ ଆରମ୍ଭ ହୋଇଛି।
ଶୁକ୍ରବାର ବିଳମ୍ବିତ ରାତିରେ ହଣ୍ଡୱାରାର ଏକ ଗାଁରେ ଆତଙ୍କବାଦୀମାନେ ଲୁଚି ରହିଥିବା ଖବର ମିଳିଥିଲା। ଏହା ପରେ ସୁରକ୍ଷା ବଳ ସମ୍ପୃକ୍ତ ଅଞ୍ଚଳକୁ ଘେରିଯାଇଥିଲେ। ଉଭୟ ପକ୍ଷ ମଧ୍ୟରେ ଶନିବାର ସକାଳ ପର୍ଯ୍ୟନ୍ତ ଗୁଳିବିନିମୟ ଜାରି ରହିଥିଲା। ଏହା ପରେ କିଛି ସମୟ ପାଇଁ ଗୁଳିବିନିମୟ ବନ୍ଦ ହୋଇଯାଇଥିଲା। ଫଳରେ ସୁରକ୍ଷା କର୍ମୀମାନେ ଆତଙ୍କବାଦୀମାନେ ଲୁଚି ରହିଥିବା ଘରେ ସର୍ଚ୍ଚ ଅପରେଶନ ଚଳାଇଥିଲେ। ଏହି ସମୟରେ ଲୁଚି ରହିଥିବା ଆତଙ୍କୀମାନେ ଯବାନଙ୍କ ଉପରକୁ ଗୁଳି ଚଳାଇଥିଲେ। ଏଥିରେ ସିଆରପିଏଫର ୩ ଯବାନ ଏବଂ ଜମ୍ମୁ ପୁଲିସର ୨ କର୍ମଚାରୀ ସହିଦ ହୋଇଥିଲେ। ଏହାପରେ ପୁଣି ଗୁଳିବିନିମୟ ଆରମ୍ଭ ହୋଇଯାଇଥିଲା।
