ସମାଜ ଡିଜିଟାଲ ଡେସ୍କ: ବଲାଙ୍ଗୀର ଜିଲା ଆଗଲପୁରର ରାମପୁର ଅଞ୍ଚଳରେ ଓଡ଼ିଶାର ପ୍ରଥମ ଡିଜିଟାଲ ପ୍ରୋସେସ ବସ ଆଧାରିତ ୧୩୨/୩୩ କେଭି ଗ୍ରୀଡ ସବଷ୍ଟେସନ ନିର୍ମାଣ ହୋଇଛି। ଉପମୁଖ୍ୟମନ୍ତ୍ରୀ ତଥା ଶକ୍ତିମନ୍ତ୍ରୀ କନକ ବର୍ଦ୍ଧନ ସିଂହଦେଓ ଏହି ସବଷ୍ଟେସନକୁ ଉଦଘାଟନ କରିଛନ୍ତି। ବଲାଙ୍ଗୀର ସାଂସଦ ସଙ୍ଗୀତା କୁମାରୀ ସିଂହଦେଓ ଏହି ଅବସରରେ ଉପସ୍ଥିତ ଥିଲେ। ଏମ୍ପାଓ୍ବାରଟ୍ରାନ୍ସ କମ୍ପାନୀ ଦ୍ଵାରା ଓପିଟିସିଏଲ ପାଇଁ ନିର୍ମିତ ଏହି ଆଧୁନିକ ସୁବିଧା ଭାରତର କୌଣସି ଷ୍ଟେଟ ଟ୍ରାନ୍ସମିସନ ୟୁଟିଲିଟି(ଏସଟିୟୁ) ଦ୍ଵାରା ପ୍ରଥମ।
ଏହି ଅବସରରେ ଏମ୍ପାଓ୍ବାରଟ୍ରାନ୍ସ କମ୍ପାନୀର ପରିଚାଳନା ନିର୍ଦେଶକ ଅସିତ ପ୍ରଧାନ କହିଥିଲେ, ଆଗଲପୁର ସବଷ୍ଟେସନଟି ଶକ୍ତି ପ୍ରଣାଳୀର ଡିଜାଇନ, ନିରୀକ୍ଷଣ ଓ ନିୟନ୍ତ୍ରଣ ପ୍ରଣାଳୀରେ ଗୁରୁତ୍ଵପୂର୍ଣ୍ଣ ଦୃଷ୍ଟାନ୍ତ। ପାରମ୍ପରିକ ସବଷ୍ଟେସନଠାରୁ ଆଗଲପୁର ସବଷ୍ଟେସନ ଭିନ୍ନ। ଏଥିରେ ପ୍ରୋସେସ ବସ୍ ଆର୍କିଟେକ୍ଚର ବ୍ୟବହାର ହୋଇଛି। ଯେଉଁଥିରେ ଉପକରଣ ପାଖରେ ଥିବା ଡିଜିଟାଲ ସେନସର, ଫାଇବର ଅପ୍ଟିକ୍ସ କମ୍ୟୁନିକେସନ ନେଟଓ୍ବର୍କ ଏବଂ ସ୍ଵୟଂକ୍ରିୟ ବୁଦ୍ଧିମତ୍ତା ବ୍ୟବସ୍ଥା ସମ୍ମିଳିତ ହୋଇଛି।
