ସମାଜ ଡିଜିଟାଲ ଡେସ୍କ: ଦିଲ୍ଲୀରେ ବିଏମଡବ୍ଲ୍ୟୁ ଧକ୍କାରେ ଅର୍ଥ ମନ୍ତ୍ରଣାଳୟର ଡେପୁଟି ସଚିବଙ୍କ ମୃତ୍ୟୁ ଘଟଣାର ଅଭିଯୁକ୍ତ ମହିଳା କାର ଚାଳକ ଗଗନପ୍ରୀତ କୌର(୩୮)ଙ୍କୁ ଗିରଫ କରିଛି ପୁଲିସ। ଏହି ଦୁର୍ଘଟଣାରେ ଅର୍ଥ ମନ୍ତ୍ରଣାଳୟର ଡେପୁଟି ସଚିବ ନଭଜୋତ ସିଂହଙ୍କ ମୃତ୍ୟୁ ଘଟିଥିଲା। ତାଙ୍କ ପତ୍ନୀ ସନ୍ଦୀପ କୌର ଗୁରୁତର ଆହତ ହୋଇଥିଲେ। ଉଭୟେ ଏକ ବାଇକରେ ଯାଉଥିବା ସମୟରେ ଗଗନପ୍ରୀତ ସେମାନଙ୍କୁ ଧକ୍କା ଦେଇଥିଲେ।
ଅନ୍ୟପଟେ ଦୁର୍ଘଟଣା ପରେ ଗଗନପ୍ରୀତ ନିଜ ସ୍ଵାମୀଙ୍କୁ ନେଇ ନିଜର ବ୍ୟକ୍ତିଗତ ହସ୍ପିଟାଲକୁ ଯାଇ ଚିକିତ୍ସିତ ହୋଇଥିଲେ। କିନ୍ତୁ ସଂଜ୍ଞାହୀନ ଅବସ୍ଥାରେ ପଡ଼ିଥିବା ନଭଜୋତଙ୍କୁ ଭଲ ଡାକ୍ତରଖାନାକୁ ନେଇ ନ ଥିଲେ। ନଭଜୋତଙ୍କ ସ୍ତ୍ରୀଙ୍କ କହିବା ଅନୁସାରେ, ସେ ଗଗନପ୍ରୀତଙ୍କୁ ତାଙ୍କ ସ୍ଵାମୀଙ୍କୁ ନିଟକରେ ଥିବା କୌଣସି ଡାକ୍ତରଖାନା କିମ୍ବା ଏମ୍ସକୁ ନେବାକୁ ଅନୁରୋଧ କରିଥିଲେ। ସେତେବେଳେ ତାଙ୍କ ସ୍ଵାମୀ ଜୀବିତ ଥିଲେ। କିନ୍ତୁ ଗଗନପ୍ରୀତ ସେମାନଙ୍କୁ ୨୨ କିଲୋମିଟର ଦୂର ଏକ ଛୋଟିଆ ଡାକ୍ତରଖାନାକୁ ନେଇ ସେଠାରେ ଛାଡ଼ି ପଳାଇଥିଲେ।
