ଚାନ୍ଦବାଲି : ଚାନ୍ଦବାଲି ଏନଏସିର ମୁଖ୍ୟ ରାସ୍ତା ମଧ୍ୟରୁ ଗୁରୁତ୍ୱ ବହନ କରୁଥିବା ଚାନ୍ଦବାଲି କାଳୀ ମନ୍ଦିରଠାରୁ କନ୍ଧା ଦୀର୍ଘ ୫ କିମି ରାସ୍ତା ଏବେ ମରଣ ଯନ୍ତା ପାଲଟିଛି କହିଲେ ଅତ୍ୟୁକ୍ତି ହେବନି। ଦୁଇ ବର୍ଷ ପୁରି ଯାଇଥିଲେ ମଧ୍ୟ ରାସ୍ତା କାମ ଆରମ୍ଭ ହୋଇପାରିଲା ନାହିଁ । ଅଞ୍ଚଳବାସୀ ବହୁ ବାର ବିଭାଗୀୟ ଅଧିକାରୀ ଓ ଜିଲ୍ଲାପାଳଙ୍କୁ ଅଭିଯୋଗ ପରେ ମଧ୍ୟ ରାସ୍ତା କାର୍ଯ୍ୟ ହେଉ ନଥିବା ଅଭିଯୋଗ ହୋଇଛି ।
ସୂଚନା ମୁତାବକ ୨୦୨୩ ମାର୍ଚ୍ଚରେ ଏହି ରାସ୍ତା ପାଇଁ ବିଧାୟକ ବ୍ୟୋମକେଶ ରାୟ ଭିତ୍ତିପସ୍ତର ସ୍ଥାପନ କରିଥିଲେ । ପୁର୍ତ୍ତ ଅଧୀନରେ ଥିବା ଏହି ୫ କିମି ବିଶିଷ୍ଟ ରାସ୍ତା ପାଇଁ ୭ କୋଟି ୪୦ ଲକ୍ଷ ଟଙ୍କା ବ୍ୟୟବରଦାରେ ଟେଣ୍ଡର ହୋଇଥିଲା। ଦୁଇ ବର୍ଷ ପୂର୍ବରୁ ଶିଳାନ୍ୟାସ ସରିଥିଲେ ମଧ୍ୟ ଆଜି ପର୍ଯ୍ୟନ୍ତ ରାସ୍ତା କାମ ହୋଇପାରିଲା ନାହିଁ। ଏହି ରାସ୍ତା କାମର ଅବଧି ୨୫/୦୪/୨୦୨୩ ରୁ ୨୪/୦୧/୨୦୨୪ ସରିଯାଇଥିଲେ ମଧ୍ୟ କାମ ଆରମ୍ଭ ହୋଇ ନାହିଁ ।
ଚାନ୍ଦବାଲି ଏନଏସି ସମେତ ୭/୮ଟି ପଞ୍ଚାୟତର ଲୋକଙ୍କ ପାଇଁ ଏହା ଏକମାତ୍ର ରାସ୍ତା। ଏନେଇ ସୋମବାର ଦିନ ଶତାଧିକ ଲୋକ ତୁରନ୍ତ ରାସ୍ତା ମରାମତି ଦାବିରେ ବର୍ଷାରେ ଭିଜି କନ୍ଧା ଠାରୁ ଏକ ରାଲି କରି ଚାନ୍ଦବାଲି ଏନ ଏ ସି, ତହସିଲ, ବ୍ଲକ ଓ ପୂର୍ତ୍ତି ବିଭାଗ କାର୍ଯ୍ୟାଳୟରେ ପହଁଚିବା ସହ ଆମର ତୁରନ୍ତ ଦାବୀ ରାସ୍ତା ନିର୍ମାଣ ବୋଲି ନାରା ଓ ଦାବୀ ପତ୍ର ଦେଇଥିଲେ। ରାସ୍ତା ଖରାପ ଯୋଗୁ ଅନେକ ସମୟରେ ଦୁର୍ଘଟଣା ଘଟି ଲୋକେ ଆହତ ସହ ମୃତ୍ୟୁ ବରଣ କରୁଛନ୍ତି। ହେଲେ ବିଭାଗୀୟ ଅଧିକାରୀ ଓ ନିଯୁକ୍ତ ଠିକା ସଂସ୍ଥା ସମ୍ପୂର୍ଣ ବେଫିକର ଏବଂ ଠିକା ସଂସ୍ଥା ଓ ବିଭାଗୀୟ ଅଧିକାରୀଙ୍କ ମଧୁ ଚନ୍ଦ୍ରିକା ପାଇଁ ରାସ୍ତା କାମ ଆରମ୍ଭ ହୋଇପାରୁନି ବୋଲି ଅଞ୍ଚଳବାସୀ ଅଭିଯୋଗ କରୁଛନ୍ତି। ଅନ୍ୟପଟେ ଏହି ବିଷୟରେ ଚାନ୍ଦବାଲି ବିଡ଼ିଓ ସଂଜୀବ କୁମାର ମହାପାତ୍ର ବ୍ଲକରେ ଦାବୀ ଗ୍ରହଣ କରି ପୂର୍ତ୍ତ ବିଭାଗର ଅଧିକାରୀଙ୍କୁ ତୁରନ୍ତ କାର୍ଯ୍ୟ ଆରମ୍ଭ ପାଇଁ ନିର୍ଦେଶ ଦେବେ ବୋଲି ସୂଚନା ଦେଇଛନ୍ତି।
