ସମ୍ବଲପୁର: ପଶ୍ଚିମ ଓଡିଶାର ସର୍ବ ବୃହତ ଗଣପର୍ବ ‘ନୁଆଁଖାଇ’ ଆସନ୍ତା ଅଗଷ୍ଟ ୨୮ ତାରିଖ ଗୁରୁବାର ଦିନ ସର୍ବତ୍ର ପାଳନ ହେବ। ଚଳିତ ବର୍ଷର ‘ନୂଆଁଖାଇ ବା ନବାନ୍ନ’ ପାଳନ କରିବା ପାଇଁ ଶନିବାର ପବିତ୍ର ନନ୍ଦୋତ୍ସବ ତିଥିରେ ଅପରାହ୍ନ ୪ଟା ୩୦ରେ ସମ୍ବଲପୁରର ଝାଡୁଆପଡାସ୍ଥିତ ବ୍ରହ୍ମପୁରା ମନ୍ଦିରଠାରେ ପଣ୍ଡିତ ଓ ବିଦ୍ୱାନମାନେ ଶୁଭ ଲଗ୍ନ ନିର୍ଦ୍ଧାରଣ କରିଛନ୍ତି। ପରମ୍ପରା ଅନୁଯାୟୀ, ଜନ୍ମାଷ୍ଟମୀର ପରଦିନ ନନ୍ଦୋତ୍ସବରେ ନୂଆଁଖାଇ ଲଗ୍ନ ଧାର୍ଯ୍ୟ କରାଯାଇଥାଏ। ଏହା ପରେ ସେହି ଲଗ୍ନ ପତ୍ରକୁ ବ୍ରହ୍ମପୁରା ମନ୍ଦିର ପୂଜକ, ପଣ୍ଡିତ ଓ ଟ୍ରଷ୍ଟ ସଦସ୍ୟମାନେ ମାଁ ସମଲେଶ୍ୱରୀଙ୍କ ନିକଟରେ ଅର୍ପଣ କରିଛନ୍ତି।
ଚଳିତ ବର୍ଷର ଲଗ୍ନପତ୍ର ଅନୁଯାୟୀ, ପ୍ରଥମ ଉତ୍ପାଦିତ ଶସ୍ୟରୁ ନିର୍ମିତ ପିଠା ଓ ଖିରି ଅଧିଷ୍ଠାତ୍ରୀ ଦେବୀ ମାଁ ସମଲେଶ୍ୱରୀଙ୍କୁ ‘ବୀର ବିକ୍ରମ ସମ୍ବତ ୨୦୮୨, ଶକାବ୍ଦଃ ୧୯୪୭, ସନ ୧୪୩୨, ଦିବସିଂହ ଦେବ ୬୮ ଅଙ୍କ, ଇଂରାଜୀ ତାରିଖ ୨୮ ଅଗଷ୍ଟ ୨୦୨୫ ଭାଦ୍ରବ ଶୁକ୍ଲପକ୍ଷ ପଞ୍ଚମୀ ତିଥି ଗୁରୁବାର ଦିବା ଘ.୧୦ଟା ୩୩ ମିନିଟରୁ ଘ.୧୦ଟା ୫୫ ମିନିଟ ମଧ୍ୟରେ ତୁଳା ଲଗ୍ନେ, ମୀନ ନବାଂଶେ’ ନବାହ୍ନ ଭୋଗ ଲାଗି ହେବ। ଏହା ପରେ ପଶ୍ଚିମ ଓଡିଶାବାସୀ ନବାନ୍ନ ଭକ୍ଷଣ କରିବେ। ଟ୍ରଷ୍ଟ କମିଟି ତରଫରୁ ଆୟୋଜିତ ଏହି ଧାର୍ମିକ ବୈଠକରେ ପଣ୍ଡିତ ମହେଶ୍ୱର ନାୟକ, ଲକ୍ଷ୍ମଣ ବେହେରା, ସୁଧାଂଶୁ ଶେଖର ପାଣିଗ୍ରାହୀ, ଅକ୍ଷୟ ପୁରୋହିତ, ବଂଶୀଧର ଶତପଥୀ, ଗିରିଜାର ଶଙ୍କର ପଣ୍ଡା, ଝସକେତନ ହୋତା, ରବି ନାରାୟଣ ପଣ୍ଡା, ସଚ୍ଚିଦାନନ୍ଦ ମିଶ୍ର, ପ୍ରଭାକର ତ୍ରିପାଠୀ, ଦାଶରଥି ପୁରୋହିତ, କୃଷ୍ଣ ଚନ୍ଦ୍ର ପାଣିଗ୍ରାହୀ, ରାକେଶ ମିଶ୍ର, ଚନ୍ଦ୍ର ପାଣିଗ୍ରାହୀ, ବୁଲୁ ପାଢ଼ୀ, ବିନୀତ ପାଣ୍ଡେ, ମନବୋଧ ପାଢ଼ୀ, ଉତ୍ତମ ରଥ ଓ ଜିତେନ୍ଦ୍ର ନନ୍ଦ ପ୍ରମୁଖ ଉପସ୍ଥିତ ଥିଲେ।
