ଗଞ୍ଜାମ: ରମ୍ଭା ଥାନା ଅନ୍ତର୍ଗତ ୧୬ ନମ୍ବର ଜାତୀୟ ରାଜପଥ ଗୋଲା ଗଣ୍ଡାପଲୀ ନିକଟରେ ଅଜଣା ଗାଡି ଧକ୍କାରେ ଜଣେ ଯୁବତୀଙ୍କ ମୃତ୍ୟୁ ଘଟିଛି। ମୃତା ଯୁବତୀ ହେଲେ ଖୋର୍ଦ୍ଧା ଜିଲ୍ଲା ସରପାରୀ ଗ୍ରାମର ନିରଞ୍ଜନ ସେଠୀଙ୍କ ଝିଅ ଅଙ୍କିତା ସେଠୀ।
ମୃତ ଅଙ୍କିତାଙ୍କ ସମ୍ପର୍କୀୟଙ୍କ କହିବା ଅନୁଯାୟୀ, ଅଙ୍କିତା ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ବାଲେଡି ଗ୍ରାମର ପୋଷ୍ଟ ଅଫିସରେ ୧୫ ଦିନ ପୂର୍ବରୁ ପୋଷ୍ଟାଲ କର୍ମଚାରୀ ଭାବେ ନିଯୁକ୍ତି ପାଇଥିଲେ। ସେ ତାଙ୍କ ମାମୁଁ ଘର ପୁରୀ ଜିଲା ପାରିକୁଦ ଅଞ୍ଚଳର ବୁଦ୍ଧିବର ଗ୍ରାମକୁ ସ୍କୁଟି ଯୋଗେ ଯାଉଥିବା ବେଳେ ଗୋଲା ଗଣ୍ଡାପଲୀ ନିକଟରେ ଏକ ଅଜଣା ଗାଡ଼ି ତାଙ୍କୁ ଧକ୍କା ଦେଇ ପଳାଇଥିଲା।
ଅଙ୍କିତା ରାସ୍ତାରେ ପଡି ଛଟପଟ ହେଉଥିବା ବେଳେ ସ୍ଥାନୀୟ ଲୋକମାନେ ଅଗ୍ନିଶମ ବାହିନୀ ଗାଡି ଦ୍ଵାରା ନିକଟସ୍ଥ ଖଲ୍ଲିକୋଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା ପାଇଁ ଭର୍ତ୍ତି କରିଥିଲେ। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଘଟଣାସ୍ଥଳରେ ପୁଲିସ ପହଞ୍ଚି ସ୍କୁଟିକୁ ଜବତ କରିବା ସହ ତଦନ୍ତ ଆରମ୍ଭ କରିଛି। ମୃତଦେହ ବ୍ୟବଚ୍ଛେଦ ନିମନ୍ତେ ଖଲ୍ଲିକୋଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଶବ ଗୃହରେ ରଖାଯାଇଛି।
