ବିମାନ ଅପହରଣ କରି ପାକିସ୍ତାନ ନେଇଯିବାକୁ ଧମକ, ସତର୍କ ସୂଚନା ଜାରି

ନୂଆଦିଲ୍ଲୀ : ଏୟାର ଇଣ୍ଡିଆର ମୁମ୍ବଇ ନିୟନ୍ତ୍ରଣ କେନ୍ଦ୍ରକୁ ଶନିବାର ଏକ ଧମକପୂର୍ଣ୍ଣ କଲ ଆସିଛି। ବିମାନ ଅପହରଣ କରି ପାକିସ୍ତାନ ନେଇଯିବାକୁ ଏହି କଲରେ ଧମକ ଦିଆଯାଇଛି। ଏହାପରେ ବେସାମରିକ ବିମାନ ଚଳଚାଳ ମନ୍ତ୍ରାଳୟ ଏବଂ ବେସାମରିକ ବିମାନ ସୁରକ୍ଷା ବ୍ୟୁରୋ (ବିସିଏଏସ୍‍) ସମସ୍ତ ଏୟାରଲାଇନ୍ସ ଓ ବିମାନ ବନ୍ଦରଗୁଡ଼ିକୁ ସତର୍କ ସୂଚନା ଜାରି କରିଛି। ସିଆଇଏସ୍‍ଏଫକୁ କଡ଼ା ସତର୍କତା ଅବଲମ୍ବନ କରିବାକୁ ନିର୍ଦେଶ ଦିଆଯାଇଛି। ବିମାନରେ ଚଢୁଥିବା ଯାତ୍ରୀଙ୍କ କଡ଼ା ତଲାସୀ କରାଯାଉଛି। ସେହିପରି ପାର୍କିଂରେ ରଖାଯାଉଥିବା ଗାଡ଼ିର ବ୍ୟାପକ ଯାଞ୍ଚ କରାଯାଉଛି।
ସୂଚନା ଅନୁସାରେ ଶନିବାର ଅପରାହ୍ଣରେ ଏୟାର ଇଣ୍ଡିଆ ବିମାନ ଅପହରଣ କରିବା ନେଇ ଧମକପୂର୍ଣ୍ଣ କଲ ଆସିଥିଲା। ଏହାପରେ ସମସ୍ତ ବିମାନ ସଂଚାଳକଙ୍କୁ ତତ୍କାଳ ପ୍ରଭାବରେ ୮ଟି ସୁରକ୍ଷା ଉପାୟ ଅବଲମ୍ବନ ଓ ସୁନିଶ୍ଚିତ କରିବାକୁ ନିର୍ଦେଶ ଦିଆଯାଇଛି। ଟର୍ମିନାଲ ବିଲ୍ଡିଂ, ଏୟାର ସାଇଡ, ସବୁ ପରିଚାଳନା ଅଞ୍ଚଳ, ବିମାନ ଆଗମନ ଓ ପ୍ରସ୍ଥାନ ନିୟନ୍ତ୍ରଣ, ଯାତ୍ରୀ, କର୍ମଚାରୀ ଏବଂ ଆଗନ୍ତୁକଙ୍କ ଭଲରେ ଯାଞ୍ଚ କରାଯିବାକୁ ନିର୍ଦେଶ ଦିଆଯାଇଛି। ମାଲବାହୀ କାର୍ଗୋ, କାର୍ଗୋ ଟର୍ମିନାଲ, ମେଲ ପ୍ରଭୁ ଯାଞ୍ଚ କରିବାକୁ କୁହାଯାଇଛି। ଜାତୀୟ ରାଜଧାନୀ ଦିଲ୍ଲୀର ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନ ବନ୍ଦର ସମେତ ଦେଶର ଅନ୍ୟ ବିମାନ ବନ୍ଦରରେ ସୁରକ୍ଷା ବ୍ୟବସ୍ଥାକୁ ବଢାଇ ଦିଆଯାଇଛି।