ସମାଜ ଡିଜିଟାଲ ଡେସ୍କ: ୧୯୦୮ ମସିହାରେ ମୁଜାଫରପୁରରେ ଜଣେ ଯୁବକଙ୍କୁ ଫାଶୀ ଦିଆଯିବାର ଥିଲା। କିନ୍ତୁ ତାଙ୍କ ମନରେ କୌଣସି ଭୟ ନ ଥିଲା। ଫାଶୀ ଖୁଣ୍ଟରେ ଝୁଲିବାକୁ ଯାଉଥିବା ସତ୍ବେ ତାଙ୍କ ମୁହଁରେ ଗଭୀର ଆତ୍ମବିଶ୍ଵାସ ଭରି ରହିଥିଲା। ସେହି ଯୁବକ ଜଣକ ହେଉଛନ୍ତି ଖୁଦିରାମ ବୋଷ। ମାତ୍ର ୧୮ ବର୍ଷ ବୟସରେ ସେ ସାରା ଦେଶକୁ ଦୋହଲାଇ ଦେଇଥିଲେ ବୋଲି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ରବିବାର ‘ମନ୍ କୀ ବାତ୍’ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ସ୍ଵାଧୀନତା ସଂଗ୍ରାମର ଗାଥାକୁ ମନେପକାଇ ବୀର ସଂଗ୍ରାମୀମାନଙ୍କ ବଳିଦାନକୁ ସ୍ମରଣ କରିଥିଲେ। ପ୍ରଧାନମନ୍ତ୍ରୀ କହିଥିଲେ, ଖୁଦିରାମଙ୍କ ପରି ଅନେକ ସଂଗ୍ରାମୀଙ୍କ ବଳିଦାନ ପରେ ଆମେ ସ୍ଵାଧୀନତା ପାଇଥିଲୁ। ଅଗଷ୍ଟ ମାସ ହେଉଛି ବିପ୍ଳବର ମାସ। ଅଗଷ୍ଟ ୧୫ ତାରିଖରେ ଆମେ ଆମ ସ୍ଵାଧୀନତା ସଂଗ୍ରାମୀଙ୍କୁ ମନେ ପକାଉ।
ମୋଦୀ ଆହୁରି କହିଥିଲେ, ୧୯୦୫ ଅଗଷ୍ଟ ୭ରେ ଏକ ନୂଆ ବିପ୍ଳବ ଆରମ୍ଭ ହୋଇଥିଲା। ସ୍ଵଦେଶୀ ଆନ୍ଦୋଳନ ସ୍ଵଦେଶୀ ଉତ୍ପାଦଗୁଡ଼ିକୁ ନୂଆ ଶକ୍ତି ଯୋଗାଇଥିଲା, ବିଶେଷକରି ହସ୍ତତନ୍ତ ସାମଗ୍ରୀକୁ। ଏହାକୁ ସ୍ମରଣ କରି ଦେଶ ପ୍ରତିବର୍ଷ ଅଗଷ୍ଟ ୭ରେ ଜାତୀୟ ହସ୍ତତନ୍ତ ଦିବସ ପାଳନ କରିଆସୁଛି। ଏହି କ୍ଷେତ୍ର ଏବେ ଦେଶର ଶକ୍ତି ଭାବେ ଉଭା ହୋଇଛି ବୋଲି ମୋଦୀ କହିଛନ୍ତି।
