ଭୁବନେଶ୍ୱର/କଟକ: ସହିଦଙ୍କ ସମ୍ପର୍କୀୟଙ୍କୁ ଧକ୍କା ମାରିବା ଏବଂ ତଣ୍ଟିଆ ମାରିବା ବାରବାଟୀ ବିଧାୟକ ଦେବାଶିଷ ସାମନ୍ତରାୟଙ୍କ ପାଇଁ ମହଙ୍ଗା ପଡିଛି । ପାକିସ୍ତାନ ଗଣମାଧ୍ୟମରେ ଏହା ପ୍ରସାର ହେବା ପରେ ବିଧାୟକଙ୍କ ଅଡୁଆ ଆହୁରି ବଢିଯାଇଛି । ସଦିଦଙ୍କ ସମ୍ପର୍କୀୟଙ୍କୁ ଅସମ୍ମାନ କରିବା ପ୍ରତିବାଦରେ କଂଗ୍ରେସ ଦଳ ବିଧାୟକଙ୍କ ଗିରଫ ଦାବି କରିଛି । କଟକ ନଗର କଂଗ୍ରେସ ମହିଳା ମୋର୍ଚ୍ଚା ଶୁକ୍ରବାର ବାଦାମବାଡ଼ି ଥାନାରେ ଦେବାଶିଷଙ୍କ ନାମରେ ଲିଖିତ ଅଭିଯୋଗ କରିଥିବା ବେଳେ କଂଗ୍ରେସ ଦଳର ବରିଷ୍ଠ ନେତା ପଞ୍ଚାନନ କାନୁନଗୋ ଏକ ସାମ୍ବାଦିକ ସମ୍ମିଳନୀରେ ବିଧାୟକଙ୍କ ବିରୋଧରେ ଗର୍ଜିଛନ୍ତି । ବିଧାୟକ ଦେବାଶିଷ ସାମନ୍ତରାୟ ଦେଶକୁ ସାରା ବିଶ୍ୱରେ ଲଜ୍ଜିତ କରିଛନ୍ତି । ଏଥିପାଇଁ ମୁଖ୍ୟମନ୍ତ୍ରୀ ଦେଶବାସୀଙ୍କୁ କ୍ଷମା ମାଗନ୍ତୁ । ଦେବାଶିଷଙ୍କୁ ଅତିଶୀଘ୍ର ଦଳରୁ ବହିଷ୍କାର କରାଯାଉ ବୋଲି କଂଗ୍ରେସ ନେତା ପଞ୍ଚାନାନ କାନୁନଗୋ ସମ୍ମିଳନୀରେ କହିଛନ୍ତି ।
ସୂଚନାଯୋଗ୍ୟ, ପୁଲୱାମା ବିସ୍ଫୋରଣରେ ଓଡିଶାର ଦୁଇଜଣ ଯବାନ ସହିଦ ହୋଇଥିଲେ । ସହିଦ ମନୋଜ ବେହେରାଙ୍କ ଶେଷକୃତ୍ୟ ସମୟରେ ବିଜୁ ଜନତା ଦଳର ବିଧାୟକ ଦେବାଶିଷ ସାମନ୍ତରାୟ ସହିଦଙ୍କ ଦାଦାଙ୍କୁ ଧକ୍କା ମାରିବା ସହ ତଣ୍ଟିଆ ମରିଥିବା ଏକ ଭିଡିଓ ଭାଇରାଲ ହୋଇଥିଲା । ଭିଡିଓଟି ଲୋକଲୋଚନକୁ ଆସିବା ପରେ ବିଧାୟକ କ୍ଷମା ପ୍ରର୍ଥନା କରିବା ସହ ଏହାକୁ ରାଜନୀତି ନ କରାଯାଉ ବୋଲି କହିଥିଲେ । ଏହି ଭିଡିଓକୁ ପାକିସ୍ତାନ ଗଣମାଧ୍ୟମରେ ମଧ୍ୟ ପ୍ରସାରଣ କରିଥିଲା । ଯେଉଁଥିରେ ଭାରତୀୟ ନେତା ଏବଂ ଜନତାଙ୍କ ସହିଦଙ୍କ ପ୍ରତି କେତେ ଭଲ ପାଇବା ରହିଛି ତାହାର ଏହା ବାସ୍ତବ ଚିତ୍ର ବୋଲି କୁହାଯାଇଥିଲା ।
