କୋକସରା : କୋକସରା ବ୍ଲକ ମୁଖ୍ୟାଳୟର ଅଚଳ ହାଇମାକ୍ସ ଓ ଷ୍ଟ୍ରିଟ୍ ଲାଇଟ୍ ମୁଖ୍ୟ ସମସ୍ୟା ରୂପେ ଉଭା ହୋଇଛି । ମୁଖ୍ୟାଳୟ ହୋଇଥିବାରୁ ଜନ ଗହଳି ସ୍ଥାନ ସହ ରହିଛି ଅନେକ ସରକାରୀ ବେସରକାରୀ କାର୍ଯ୍ୟାଳୟ । ବ୍ଲକର ୨୨ ପଞ୍ଚାୟତ ବ୍ୟତୀତ ପଡୋଶୀ ବ୍ଲକ ଜୟପାଟଣା ତଥା ଦଣ୍ଡପାଟ ଅଞ୍ଚଳର ଅନେକ ଲୋକ ଦୈନନ୍ଦିନ କୋକସରା ସହର ଉପରେ ନିର୍ଭର କରିଥାନ୍ତି । ଯେକୌଣସି ସ୍ଥାନକୁ ଯାତ୍ରା ପାଇଁ ଦୈନିକ ଶତାଧିକ ଯାତ୍ରୀ ସନ୍ଧ୍ୟା ହେଲେ କୋକସରା ବସଷ୍ଟାଣ୍ଡ ସହିତ ବିଭିନ୍ନ ଛକ ମାନଙ୍କରେ ଅପେକ୍ଷା କରି ରୁହନ୍ତି । କିନ୍ତୁ କୋକସରା ଗ୍ରାମରେ ବ୍ଲକ,ପଞ୍ଚାୟତ ଓ ଅନ୍ୟାନ୍ୟ ପାଣ୍ଠି ରୁ ଲଗା ଯାଇଥିବା ହାଇମାକ୍ସ ଓ ଷ୍ଟ୍ରିଟ୍ ଲାଇଟ୍ ମରାମତି ଅଭାବରୁ ଅଚଳ ହୋଇ ପଡିଛି । ଫଳରେ ସନ୍ଧ୍ୟା ହେବାମାତ୍ରେ କୋକସରା ସହର ମୁଖ୍ୟ ରାସ୍ତା ସହ ହସ୍ପିଟାଲ ଛକ, ବସ ଷ୍ଟାଣ୍ଡ, ପୋଲିସ ଛକ, ଶିବ ମନ୍ଦିର ଛକ, ଜଗନ୍ନାଥ ମନ୍ଦିର ଛକରେ ଲାଗିଥିବା ହାଇମାକ୍ସ ଓ ଗାଁର ବିଭିନ୍ନ ପଡ଼ାରେ ଲାଗିଥିବା ଷ୍ଟ୍ରିଟ୍ ଲାଇଟ୍ ଦିର୍ଘ ମାସ ହେବ ଅଚଳ ଅବସ୍ଥାରେ ପଡି ରହିଛି । ଯାହାଦ୍ବାରା ଗଳି କନ୍ଦିରେ ସରୀସୃପ ଭୟ ରହିଥିବା ବେଳେ ଯାତ୍ରୀ ମାନେ ସନ୍ଧ୍ୟା ପରେ ଚୋର ଖଣ୍ଟ ଭୟରେ ନିଜକୁ ସୁରକ୍ଷିତ ମଣୁ ନଥିବା ଅଭିଯୋଗ କରିଛନ୍ତି ।
ସୂଚନାଯୋଗ୍ୟ ଯେ ସଦର ପଞ୍ଚାୟତ ଗତବର୍ଷ ଲାଇଟ ଗୁଡକୁ ମରାମତି କରିଥିଲା । କିନ୍ତୁ କିଛି ମାସ ଜଳିବା ପରେ ତାହା ପୁଣି ଅଚଳ ହୋଇ ପଡିଛି । ଗ୍ରାମବାସୀ ପଞ୍ଚାୟତ କର୍ତ୍ତୃପକ୍ଷଙ୍କୁ ଲାଇଟ ମରାମତି କରିବା ପାଇଁ ଅଭିଯୋଗ ସତ୍ତ୍ୱେ ମଧ୍ୟ ପଞ୍ଚାୟତ ପକ୍ଷରୁ କୌଣସି ପଦକ୍ଷେପ ନେଇ ନାହାଁନ୍ତି । ଯାହା ଫଳରେ ସନ୍ଧ୍ୟା ପରେ ଅନ୍ଧକାରରେ ଅଞ୍ଚଳବାସୀ ଯାତାୟାତ କରୁଛନ୍ତି। ନିକଟ ଅତୀତରେ ଗାଁରେ ଚୋରି, ଡକାୟତି,ରାହାଯାନୀ ଘଟଣା ଲୋକାଙ୍କୁ ଭୟଭୀତ କରୁଛି । ରାତିରେ ବୁଲା କୁକୁରଙ୍କ ଉତ୍ପାତ ମଧ୍ୟ ବଢ଼ି ଚାଲିଛି । ଡାକ୍ତରଖାନା ମଝିରେ ଥିବା ହାଇମାକ୍ସ ଜଳୁ ନ ଥିବାରୁ ରୋଗୀ ଓ ତାଙ୍କ ସମ୍ପର୍କୀୟମାନେ ଅସୁବିଧାର ସମ୍ମୁଖୀନ ହେଉଥିବା ଅଭିଯୋଗ କରିଛନ୍ତି । ସ୍ଥାନୀୟ ବ୍ଲକ ପ୍ରଶାସନ ଓ କୋକସରା ପଞ୍ଚାୟତ କର୍ତ୍ତୃପକ୍ଷ ଯଥାଶୀଘ୍ର ଷ୍ଟ୍ରିଟ ଲାଇଟ ମରାମତି କରିବାକୁ କୋକସରା ଅଞ୍ଚଳବାସୀ ଦାବି କରିଛନ୍ତି ।
