କଲ୍ୟାଣସିଂହପୁର: ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ବୁଡଗୁଡା ପଞ୍ଚାୟତର ଦେଉଳବାଡି ଗ୍ରାମରେ ପାନୀୟ ଜଳ ସମସ୍ୟା ନେଇ ‘ସମାଜ’ରେ ଖବର ପ୍ରକାଶ ପାଇବା ପରେ ମଙ୍ଗଳବାର ଗୋଟିଏ ନଳକୂପ ମରାମତି କରାଯାଇଛି। ବୁଡଗୁଡା ସରପଞ୍ଚ ଶ୍ରୀରାମ କାଡ୍ରାକା, ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ବିଷ୍ଣୁ ପ୍ରସାଦ ପାଣିଗ୍ରାହୀ, ଜଳ ଯୋଗାଣ ଓ ପରିମଳ ବିଭାଗର କନିଷ୍ଠ ଯନ୍ତ୍ରୀ ବିଭୁତି ପଣ୍ଡା, ଏସିଏମମାନେ ଉପସ୍ଥିତ ରହି ତିନୋଟି ନଳକୂପ ମଧ୍ୟରୁ ଗୋଟିଏ ନଳକୂପ ମରାମତି କରିଛନ୍ତି।
ଏହି ଗ୍ରାମରେ ଦୁଇଟି ସାହିରେ ପ୍ରାୟ ୩୫ଟି ଘରେ ପ୍ରାୟ ୩୦୦ ଲୋକ ବସବାସ କରନ୍ତି। ଏହି ଗ୍ରାମରେ ତିନୋଟି ନଳକୂପ ରହିଛି, କିନ୍ତୁ ଏକ ହାଣ୍ଡି ପାଣି ବାହାରୁ ନାହିଁ। ଯେଉଁ ନଳକୂପରୁ ପାଣି ବାହାରୁଛି, ତାହା ବ୍ୟବହାର ଉପଯୋଗୀ ନୁହେଁ। ସେଥିରୁ କେବଳ ଲୁହା ଗୁଣ୍ଡ ଭଳି ପାଣି ବାହାରୁଥିଲା। ଗ୍ରାମବାସୀ ନଳକୂପ ଖରାପ ହୋଇଥିବା ନେଇ ପଞ୍ଚାୟତରେ କହି ଆସୁଥିଲେ, କିନ୍ତୁ କିଛି ପ୍ରଭାବ ପଡୁନଥିଲା। ଗ୍ରାମ ପାଖରେ ଥିବା ପୋଖରୀ ନିକଟରେ ଏକ ଝର ବାହାରିବାରୁ ଗ୍ରାମବାସୀ ସେହି ଝର ନିକଟରେ ଏକ ଚୁଆଁ ଖୋଳି ସେହି ପାଣି ବ୍ୟବହାର କରି ଆସୁଥିଲେ। ପୋଖରୀରେ ଗାଈଗୋରୁଠାରୁ ଆରମ୍ଭକରି ଲୋକମାନେ ଓ ଲୁଗାପଟା ସଫା ମଧ୍ୟ କରି ସେହି ପାଣିକୁ ବ୍ୟବହାରୁ କରି ଆସୁଛନ୍ତି। ଫଳରେ ଗ୍ରାମରେ ପ୍ରାୟ ୩ରୁ ୪ ଜଣ କିଡ୍ନୀ ରୋଗରେ ଆକ୍ରାନ୍ତ ସହ ଅନ୍ୟ ଲୋକମାନେ ବିଭିନ୍ନ ରୋଗରେ ଆକ୍ରାନ୍ତ ହୋଇ ଚିକିତ୍ସିତ ହେଉଥିବା ଜଣାପଡ଼ିଛି। ଏହାକୁ ନେଇ ନେତାଠାରୁ ଆରମ୍ଭକରି ପଞ୍ଚାୟତ, ବ୍ଲକ ପ୍ରଶାସନକୁ ବାରମ୍ବାର ଗୁହାରି କରି ଆସୁଥିଲେସୁଦ୍ଧା କୌଣସି ସୁଫଳ ମିଳୁ ନଥିବା ଗ୍ରାମର ମମିଳା ଝାଲିଆ, ମାଣିକାଲୁ ମହେଶ୍ୱେରୀ, ସହେନ୍ଦ୍ରି ସାଲକା, ଗାଙ୍ଗନା କୁନି, କସ୍ତୁରୀ ଗୁନା, ପାର୍ବତୀ ସାହୁ, ଦାଣ୍ଡୁପାତି ସାରଦା, ଦାଣ୍ଡୁପାତି ଗୌରୀ, ଦାଣ୍ଡୁପାତି ପାର୍ବତୀ ପ୍ରମୁଖ ଅଭିଯୋଗ କରିଥିଲେ। ଏହାକୁ ନେଇ ବୁଡଗୁଡା ସରପଞ୍ଚ ଶ୍ରୀରାମ କାଡ୍ରାକା, ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ବିଷ୍ଣୁ ପ୍ରସାଦ ପାଣିଗ୍ରାହୀ ଏହୀ ଗ୍ରାମକୁ ଯାଇ ସମସ୍ୟା ସମାଧାନ କରାଯିବ ବୋଲି କହି ଆଜି ପର୍ଯ୍ୟନ୍ତ କରିନଥିବା ଗ୍ରାମବାସୀ କହିଥିଲେ। ଏ ସମ୍ପର୍କରେ ଜଳ ଯୋଗାଣ ଓ ପରିମଳ ବିଭାଗର କନିଷ୍ଠ ଯନ୍ତ୍ରୀ ବିଭୁତି ପଣ୍ଡାଙ୍କୁ ପଚାରିବାରୁ ଏ ସମ୍ପର୍କରେ କେହି ଜଣାଇ ନାହାନ୍ତି, ଦୁଇ ଦିନ ମଧ୍ୟରେ ସମସ୍ୟା ସମାଧାନ କରାଯିବ ବୋଲି କହି ମରାମତି କରିଦେଇଛନ୍ତି।
