ସମାଜ ଡିଜିଟାଲ ଡେସ୍କ: ପୁଲିସ ମାଲଖାନାରୁ ୫୧ ଲକ୍ଷ ଟଙ୍କା ଏବଂ ସୁନା ଅଳଙ୍କାର ଚୋରି କରିନେଇଥିବା ଜଣେ ହେଡ୍ କନଷ୍ଟେବଳ ଧରାପଡ଼ିଛନ୍ତି। ଦିଲ୍ଲୀ ପୁଲିସର ସ୍ଵତନ୍ତ୍ର ସେଲ୍ ଅଭିଯୁକ୍ତ କନଷ୍ଟେବଳ ଖୁର୍ସିଦଙ୍କୁ ଗିରଫ କରିଛି। ଲୋଧି ରୋଡସ୍ଥିତ ମାଲଖାନାରୁ ଖୁର୍ସିତ ନଗଦ ୫୧ ଲକ୍ଷ ଟଙ୍କା ସହିତ ମୂଲ୍ୟବାନ ଅଳଙ୍କାର ନେଇଯାଇଥିଲେ।
ଖୁର୍ସିଦ ମାଲଖାନାର ସୁରକ୍ଷା ଦାୟିତ୍ଵରେ ନିୟୋଜିତ ଥିଲେ। କିନ୍ତୁ ତାଙ୍କୁ ପୂର୍ବ ଦିଲ୍ଲୀକୁ ବଦଳି କରାଯାଇଥିଲା। ଗତ ଶୁକ୍ରବାର ମାଲଖାନାରେ ତାଙ୍କର ଶେଷ ଦିନ ଥିଲା। ତେଣୁ ସେ ଶୁକ୍ରବାର ରାତିରେ ଟଙ୍କା ଏବଂ ଅଳଙ୍କାର ଧରି ଫେରାର ହୋଇଯାଇଥିଲେ। ମାଲଖାନା ଦାୟିତ୍ଵରେ ଥିବା ଅଧିକାରୀ ସିସିଟିଭି କ୍ୟାମେରା ଫୁଟେଜରୁ ଏହା ଜାଣିବା ପରେ ତୁରନ୍ତ ପୁଲିସକୁ ଖବର ଦେଇଥିଲେ। ଏହା ପରେ ତତ୍କାଳ ପୁଲିସ ପକ୍ଷରୁ ବିଭିନ୍ନ ସ୍ଥାନରେ ଚଢ଼ାଉ କରାଯାଇ ଖୁର୍ସିଦଙ୍କୁ ଗିରଫ କରାଯାଇଥିଲା।
