ପାଟଣା: ପାଟଣା ଥାନା ସାହାରପଡା ବ୍ଲକ ସିଲିପଦା ଗ୍ରାମର ବାସୁଦେବ ମହାନ୍ତ(୬୫) ଓ ତାଙ୍କ ସାନନାତି ଦିବ୍ୟାଂଶୁ ମହାନ୍ତ(୧୧) ଶୁକ୍ରବାର ନିକଟ ବୈତରଣୀ ଘାଟରେ ବୁଡି ପ୍ରାଣ ହରାଇଛନ୍ତି। ଶୁକ୍ରବାର ବାସୁଦେବଙ୍କ ବଡନାତି ଡାନିଏଲର(୧୪)ର ଜନ୍ମଦିନ ଥିଲା। ତେଣୁ ସେ ନିଜର ୨ନାତିଙ୍କୁ ନେଇ ଗାଁ ପାଖ ବୈତରଣୀରେ ଗାଧୋଇବାକୁ ଯାଇଥିଲେ। ଗାଧୋଇବା ସମୟରେ ୨ ନାତି ଗଭୀର ଜଳକୁ ଚାଲିଯିବାରୁ ସେମାନଙ୍କୁ ବଞ୍ଚାଇବାକୁ ବାସୁଦେବ ମଧ୍ୟ ଗଭୀର ପାଣିକୁ ପଶି ଯାଇଥିଲେ। ତେବେ ବଡ଼ ନାତି ପହଁରି ପହଁରି ଜୀବନ ରକ୍ଷା କରିଥିବା ବେଳେ ସାନନାତି ଦିବ୍ୟାଂଶୁ ଓ ବାସୁଦେବ ବୁଡିଯାଇ ପ୍ରାଣ ହରାଇଥିଲେ।
ସ୍ଥାନୀୟ ଲୋକେ ଉଭୟଙ୍କୁ ଉଦ୍ଧାର କରିବା ପରେ ଅଗ୍ନିଶମ ବାହିନୀ ସହାୟତାରେ ପାଟଣା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଆଣିଥିଲେ। ଦିବ୍ୟାଂଶୁର ଜୀବନ ରକ୍ଷା ଉଦ୍ଦେଶ୍ୟରେ ତାକୁ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ହେଲେ ସେଠାରେ ଡାକ୍ତର ତା’କୁ ମୃତ ଘୋଷଣା କରିଥିଲେ। ଏ ନେଇ ପାଟଣା ଥାନାରେ ଏକ ଅପମୃତ୍ୟୁ ମାମଲା୧୩/୨୦୨୫ ରୁଜୁ ହୋଇଛି। ବ୍ୟବଚ୍ଛେଦ ପରେ ଉଭୟଙ୍କ ମୃତଦେହକୁ ପରିବାରକୁ ହସ୍ତାନ୍ତର କରାଯାଇଛି। ବଡ଼ ନାତିର ଜନ୍ମଦିନରେ ଜେଜେ ଓ ସାନ ନାତିର ମୃତ୍ୟୁ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳାଇ ଦେଇଛି।
