ଲଡୁଗାଁ: ଝଡ଼ିବର୍ଷା ପ୍ରଭାବରେ କୋକସରା ବ୍ଲକର ବିଭିନ୍ନ ସ୍ଥାନରେ ମଙ୍ଗଳବାର ଅପରାହ୍ନରେ ଅନେକ କ୍ଷୟକ୍ଷତି ହୋଇଥିବା ସୂଚନା ମିଳିଛି। ତନ୍ମଧ୍ୟରେ ବରାଡ଼ଙ୍ଗା ପଞ୍ଚାୟତ ଶିଉନି ଗ୍ରାମରେ ଥିବା ଉଚ୍ଚ ପ୍ରାଥମିକ ବିଦ୍ୟାଳୟର ଟିଣ ଛାତ ଝଡ଼ ତୋଫାନ ଯୋଗୁଁଁ କ୍ଷତିଗ୍ରସ୍ତ ହୋଇଥିବା ଦେଖିବାକୁ ମିଳିଛି। ତେବେ ଏବେ ସ୍କୁଲ ଛୁଟି ଥିବା କାରଣରୁ ପିଲାଏ ଏକ ବଡ଼ ଅଘଟଣରୁ ବର୍ତ୍ତି ଯାଇଛନ୍ତି। ନଚେତ୍ କଣ ଯେ ହୋଇଥାନ୍ତା ଏ ଚିତ୍ର ଦେଖିଲେ ସ୍ପଷ୍ଟ ଭାବରେ ଅନୁମେୟ। ପୂର୍ବ ସରକାର ଅମଳରେ ୨୦୨୩-୨୪ ଆର୍ଥିକ ବର୍ଷ ଆମ ଓଡ଼ିଶା ନବୀନ ଓଡ଼ିଶା ଅନୁଦାନରୁ ୩ ଲକ୍ଷ ୫୦ ହଜାର ଅଟକଳ ପରିମାଣର ନିର୍ମାଣାଧୀନ ଏହି ବିଦ୍ୟାଳୟର ରୂପାନ୍ତରୀକରଣ କାର୍ଯ୍ୟ ନିମ୍ନମାନର ସମ୍ପାଦନ ଯୋଗୁଁଁ ଏହିଭଳି ହୋଇଛି। ଏହା ବ୍ୟତୀତ ୧୪ ନଭେମ୍ବର ୨୦୨୩ରେ କାର୍ଯ୍ୟ ଆରମ୍ଭ ହୋଇଥିଲେ ମଧ୍ୟ କାର୍ଯ୍ୟ ଶେଷ ତାରିଖ ସମ୍ପୃକ୍ତ ଫଳକରେ ଉଲ୍ଲେଖ ନାହିଁ। ଏନେଇ ସ୍ଥାନୀୟ ଜୟନାରାୟନ ପଣ୍ଡା, କମଳ ରାଉତ, କେଦାର ରାଉତ, ଦେବାନନ୍ଦ ରାଉତ, ଦସମୁ ରାଉତ ପ୍ରମୁଖ ଗ୍ରାମବାସୀମାନେ ଅଭିଯୋଗ କରିଛନ୍ତି।
ସେହିପରି ଜାତୀୟ ରାଜପଥ ୨୬ ଶିଉନି ନିକଟରେ ରାସ୍ତା ଉପରେ କାଳବୈଶାଖୀ ପ୍ରଭାବରେ ଗଛ ପଡ଼ିବା କାରଣରୁ କିଛି ସମୟ ଧରି ରାସ୍ତାରେ ଯାତାୟତ ବାଧାପ୍ରାପ୍ତ ହୋଇଥିବାବେଳେ ଖବର ପାଇ କୋକସରା ଅଗ୍ନିଶମ ବିଭାଗ କର୍ମଚାରୀ ପହଞ୍ଚି ରାସ୍ତାରୁ ଗଛ କାଟି ସଫା କରିବା ପରେ ଯାତାୟତ ସ୍ୱାଭାବିକ ହୋଇଥିଲା।
