ସମାଜ ଡିଜିଟାଲ ଡେସ୍କ: ରାଜଧାନୀ ଭୁବନେଶ୍ଵରରୁ ପ୍ରେମିକକୁ ଅପହରଣ କରିନେଲା ପ୍ରେମିକା। ନିଜ ଭଉଣୀର ପ୍ରେମିକ ଓ କିଛି ଗୁଣ୍ଡାଙ୍କୁ ଲଗାଇ ପ୍ରେମିକକୁ ଅପହରଣ କରିନେବା ପରେ ମୁଣ୍ଡ ଜାମିନ ରଖି ୧୦ ଲକ୍ଷ ଟଙ୍କା ଦାବି କଲା। ଏପରି କି ବନ୍ଦ ଘରେ ରଖି ପ୍ରେମିକକୁ ନିର୍ଯାତନା ଦେଲା। ଏଭଳି ଏକ ଘଟଣା ଉପରୁ ପରଦା ଉଠାଇଛି କମିଶନରେଟ ପୁଲିସ। ଘଟଣାରେ ସମ୍ପୃକ୍ତି ମାଷ୍ଟରମାଇଣ୍ଡ ତଥା ପ୍ରେମିକା ପ୍ରାପ୍ତି ଶର୍ମାଙ୍କ ସହିତ ଅନ୍ୟ ୪ ଅପହର୍ତ୍ତାଙ୍କୁ ପୁଲିସ ଗିରଫ କରିଛି। ଏହା ସହିତ ଅପହୃତ ପ୍ରେମିକକୁ ଝାଡ଼ଖଣ୍ଡରୁ ଉଦ୍ଧାର କରିଛି।
ପ୍ରେମିକା ପ୍ରାପ୍ତି ଏବଂ ଅପହୃତ ଯୁବକଙ୍କ ମଧ୍ୟରେ କୌଣସି କାରଣକୁ ନେଇ ବିବାଦ ଆରମ୍ଭ ହୋଇଥିଲା ହୋଇଥିଲା। ଏହା ପରେ ପ୍ରେମିକଠାରୁ ଟଙ୍କା ହଡ଼ପ କରିବା ଲାଗି ପ୍ରାପ୍ତି ଏହି ଅପହରଣ କାଣ୍ଡ ଘଟାଇଥିଲେ। ନିଜ ଭଉଣୀର ପ୍ରେମିକଙ୍କ ସହିତ ମିଶି ପୂରା ଯୋଜନା କରିଥିଲେ। ଶେଷରେ ୪ ଜଣ ଯୁବକ ୨ଟି କାରରେ ଆସି ଝାରପଡ଼ା ଅଞ୍ଚଳରୁ ପ୍ରାପ୍ତିଙ୍କ ପ୍ରେମିକଙ୍କୁ ଅପହରଣ କରିନେଇଥିଲେ। ଗତ ୩୧ ତାରିଖରେ ଏ ନେଇ ପରିବାର ପକ୍ଷରୁ ଖାରବେଳନଗର ଥାନାରେ ଅଭିଯୋଗ ହୋଇଥିଲା। କମିଶନରେଟ ପୁଲିସର ସ୍ପେଶାଲ ସ୍କ୍ବାଡ୍ ମୋବାଇଲ ଲୋକେସନ ଏବଂ ହ୍ୟୁମାନ ଇଣ୍ଟେଲିଜେନ୍ସ ଆଧାରରେ ଅପହୃତ ଯୁବକଙ୍କୁ ଉଦ୍ଧାର କରିବା ସହିତ ଅଭିଯୁକ୍ତମାନଙ୍କୁ ଗିରଫ କରିଛି।
