ସମାଜ ଡିଜିଟାଲ ଡେସ୍କ: ଡୋନାଲ୍ଡ ଟ୍ରମ୍ପ ରାଷ୍ଟ୍ରପତି ଭାବେ ଶପଥ ଗ୍ରହଣ କରିବା ପରେ ଆମେରିକାରେ ରହୁଥିବା ଭାରତୀୟମାନଙ୍କ ପାଇଁ ଅଡୁଆ ବଢ଼ିବାରେ ଲାଗିଛି। ଦେଶରେ ବେଆଇନ ଭାବେ ରହୁଥିବା ଅନ୍ୟ ଦେଶର ପ୍ରବାସୀଙ୍କୁ ଟ୍ରମ୍ପ ପ୍ରଶାସନ ସ୍ବଦେଶ ଫେରିଯିବାକୁ ଚେତାବନୀ ଦେଇଛି। ଏହା ସହିତ ସେମାନଙ୍କୁ ଗିରଫ କରି ନିଜ ନିଜ ଦେଶକୁ ଫେରାଉଛି। ଏହି କ୍ରମରେ ଆମେରିକା ପୁଲିସ ସେଠାକାର ଗୁରୁଦ୍ବାରାଗୁଡ଼ିକରେ ଚଢ଼ାଉ କରିଛି। ଗୁରୁଦ୍ବାର ଏବଂ ପୂଜାସ୍ଥଳଗୁଡ଼ିକରେ ଆତ୍ମଗୋପନ କରିଥିବା ପ୍ରବାସୀଙ୍କୁ ଧରିବାକୁ ପୁଲିସ ଅପରେସନ ଚଳାଇଛି। ତେବେ ପୁଲିସ ହଠାତ ଏପରି ଗୁରୁଦ୍ବାରାଗୁଡ଼ିକରେ ପ୍ରବେଶ କରୁଥିବାରୁ ଶିଖ ସଂଗଠନଗୁଡ଼ିକ ବିରୋଧ କରିଛନ୍ତି।
ଆମେରିକାର ସ୍ବରାଷ୍ଟ୍ର ସୁରକ୍ଷା ବିଭାଗ ଅଧୀନରେ ଥିବା ପୁଲିସ ନ୍ୟୁୟର୍କ ଏବଂ ନ୍ୟୁଜର୍ସି ଅଞ୍ଚଳରେ ଥିବା କିଛି ଗୁରୁଦ୍ବାରରେ ଚଢ଼ାଉ କରିଛି। ଏହି ଗୁରୁଦ୍ବାରାଗୁଡ଼ିକରେ ଶିଖ ବିଚ୍ଛିନ୍ନତାବାଦୀ ଏବଂ ପ୍ରବାସୀମାନେ ବେଆଇନ ଭାବେ ରହୁଥିବା ଅଭିଯୋଗ ହେବା ପରେ ପୁଲିସ ପକ୍ଷରୁ କାର୍ଯ୍ୟାନୁଷ୍ଠାନ ନିଆଯାଉଛି। ଆମେରିକା ପୁଲିସର ମୁଖପାତୟ କହିଛନ୍ତି, ବର୍ତ୍ତମାନ ଅପରାଧୀମାନେ ସୁରକ୍ଷା ପାଇଁ ଆମେରିକାର ସ୍କୁଲ ଏବଂ ଚର୍ଚ୍ଚଗୁଡ଼ିକରେ ଆତ୍ମଗୋପନ କରୁଛନ୍ତି। ଏହାକୁ ରୋକାଯିବ।
