ଓ୍ବାଶିଙ୍ଗଟନ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦେଶରେ ଟିକ୍ଟକ୍ ବ୍ୟବହାରର ସମୟସୀମା ବଢାଇ ଦେଇଛନ୍ତି। ସୋମବାର ସେ ଏକ ପ୍ରଶାସନିକ ନିର୍ଦେଶନାମାରେ ଦସ୍ତଖତ କରିଛନ୍ତି, ଯାହାଦ୍ଵାରା ଚୀନ୍ର ସର୍ଟ ଭିଡିଓ ଶେୟାରିଂ ପ୍ଲାଟଫର୍ମ ଟିକ୍ଟକ୍ର ବ୍ୟବହାର ୭୫ ଦିନ ପାଇଁ ବୃଦ୍ଧି ହୋଇଛି। ଏହି ସମୟସୀମା ମଧ୍ୟରେ ଟ୍ରମ୍ପ ଏପରି ଏକ ପ୍ରସ୍ତାବକୁ ଆଗକୁ ନେବାକୁ ଯୋଜନା କରିଛନ୍ତି, ଯାହା ୧୭୦ ମିଲିୟନ ଆମେରିକୀୟଙ୍କ ଦ୍ୱାରା ବ୍ୟବହୃତ ପ୍ଲାଟଫର୍ମ ଉପରେ ପ୍ରତିବନ୍ଧକ ଲାଗିବାରୁ ରକ୍ଷା କରିବ ଏବଂ ଜାତୀୟ ସୁରକ୍ଷାକୁ ମଧ୍ୟ ଅତୁଟ ରଖିବ।
ଟ୍ରମ୍ପଙ୍କ ଦ୍ଵାରା ସ୍ୱାକ୍ଷରିତ ଆଦେଶରେ କୁହାଯାଇଛି, ‘‘ମୁଁ ଆଜିଠାରୁ ୭୫ ଦିନ ପର୍ଯ୍ୟନ୍ତ ଏହି ନିୟମକୁ କାର୍ଯ୍ୟକାରୀ କରିବା ପାଇଁ କୌଣସି ପଦକ୍ଷେପ ନ ନେବାକୁ ଆଟର୍ଣ୍ଣି ଜେନେରାଲଙ୍କୁ ନିର୍ଦ୍ଦେଶ ଦେଉଛି, ଯଦ୍ଵାରା ମୋ ପ୍ରଶାସନକୁ ବ୍ୟବସ୍ଥିତ ଉପାୟରେ ଆଗକୁ ବଢିବାକୁ ଉଚିତ୍ ମାର୍ଗ ନିର୍ଦ୍ଧାରଣ କରିବାର ସମୟ ମିଳିପାରିବ।’’
ସୂଚନାଯୋଗ୍ୟ, ଗତ ବର୍ଷ ଏପ୍ରିଲ ମାସରେ ଜୋ ବାଇଡେନ ଟିକ୍ଟକ୍ ଉପରେ ପ୍ରତିବନ୍ଧକ ସହ ଜଡ଼ିତ ବିଧେୟକରେ ଦସ୍ତଖତ କରିଥିଲେ। ଗୃହ ଏବଂ ସିନେଟରେ ବ୍ୟାପକ ଦ୍ୱିପାକ୍ଷିକ ବହୁମତରେ ଏହି ବିଲ୍ ପାରିତ ହୋଇଥିଲା। ଏହି ବିଲ୍ ମାଧ୍ୟମରେ ଟିକ୍ଟକ୍ର ମୂଳ କମ୍ପାନୀ ବାଇଟ୍ ଡାନ୍ସକୁ ଆପ୍ରୁ ଅଲଗା ହେବା କିମ୍ବା ଆମେରିକା ଆପ୍ ଷ୍ଟୋର୍ରୁ ପ୍ରତିବନ୍ଧକର ସମ୍ମୁଖୀନ ହେବାକୁ ୨୭୦ ଦିନର ସମୟ ଦିଆଯାଇଥିଲା। ଏଥିପାଇଁ ଜାନୁଆରୀ ୧୯ ଶେଷ ତାରିଖ ଥିଲା। ଇତି ମଧ୍ୟରେ ଲୋକପ୍ରିୟ ଭିଡିଓ ଶେୟାରିଂ ଆପ୍ ଟିକ୍ଟକ୍ ଜାନୁଆରୀ ୧୮ରେ ବନ୍ଦ ହୋଇଯାଇଥିଲା। ତେବେ ସମୟସୀମା ବୃଦ୍ଧି କରିବା ନେଇ ଟ୍ରମ୍ପ ପ୍ରତିଶ୍ରୁତି ଦେବାପରେ ଆପ୍ ଏହାର ସେବାକୁ ପୁନଃ ଆରମ୍ଭ କରିଛି।
