ସମାଜ ଡିଜିଟାଲ ଡେସ୍କ: ଆମକୁ ୧୭ ଲକ୍ଷ ଟଙ୍କାର କ୍ଷତିପୂରଣ ଦରକାର ନାହିଁ। ଆମକୁ ନ୍ୟାୟ ଦରକାର। କୋର୍ଟ ଭିତରେ ବିଚାରପତିଙ୍କ ଆଗରେ ଏପରି ଦାବି କରିଛନ୍ତି କଲକାତା ପୀଡ଼ିତାଙ୍କ ପରିବାର।
କଲକାତା ଆରଜି କର ମେଡିକାଲରେ ମହିଳା ଡାକ୍ତରଙ୍କୁ ଦୁଷ୍କର୍ମ ଏବଂ ହତ୍ୟା ମାମଲାରେ ସିଆଲଦା କୋର୍ଟ ସୋମବାର ଦୋଷୀ ସଞ୍ଜୟ ରଏକୁ ମୃତ୍ୟୁ ପର୍ଯ୍ୟନ୍ତ ଜେଲ ଦଣ୍ଡାଦେଶ ଶୁଣାଇଛନ୍ତି। ଶୁଣାଣି ସମୟରେ ବିଚାରପତି ପୀଡ଼ିତାଙ୍କ ପରିବାରକୁ ୧୭ ଲକ୍ଷ ଟଙ୍କା କ୍ଷତିପୂରଣ ଦେବାକୁ ସରକାରଙ୍କୁ ନିର୍ଦେଶ ଦେଇଥିଲେ। ତେବେ ଏହି ସମୟରେ କୋର୍ଟରେ ଉପସ୍ଥିତ ପୀଡ଼ିତାଙ୍କ ପରିବାର ବିଚାରପତି ଅନିର୍ବାଣ ଦାସଙ୍କୁ କହିଥିଲେ, ଆମେ କ୍ଷତିପୂରଣ ଚାହୁଁନାହୁଁ। କିନ୍ତୁ ନ୍ୟାୟ ଚାହୁଁଛୁ।
ଦଣ୍ଡ ଶୁଣାଣି ବେଳେ ସିବିଆଇ ପକ୍ଷରୁ ଲଢୁଥିବା ଓକିଲ ଦୋଷୀକୁ ଫାଶୀ ଦଣ୍ଡ ଦେବାକୁ ଅଦାଲତଙ୍କ ନିକଟରେ ଦାବି କରିଥିଲେ। କିନ୍ତୁ ବିଚାରପତି ଏହି ମାମଲା ବିରଳରୁ ଅତି ବିରଳତମ ନୁହେଁ ବୋଲି ଦର୍ଶାଇ ଆଜୀବନ କାରାଦଣ୍ଡାଦେଶ ବା ମୃତ୍ୟୁ ପର୍ଯ୍ୟନ୍ତ କାରାଦଣ୍ଡ ଭୋଗିବାକୁ ପଡ଼ିବ ବୋଲି ରାୟ ଶୁଣାଇଥିଲେ।
