ଚମ୍ପୁଆ: ଚମ୍ପୁଆ ପୁଲିସ ପକ୍ଷରୁ କୋଦଗାଡିଆ ନିକଟରେ ଚଢାଉ କରି ଦୁଇ ଜଣ ଯୁବକଙ୍କ ନିକଟରୁ ଦୁଇଟି ପିସ୍ତଲ, ଦୁଇଟି ମୋବାଇଲ ଫୋନ, ଦଶ ରାଉଣ୍ଡ ଗୁଳି ଓ ଗୋଟିଏ ମୋଟର ସାଇକଲ ଜବତ କରାଯାଇଛି। ଏ ସମ୍ବନ୍ଧରେ ଚମ୍ପୁଆ ପୁଲିସ ଏସଡିପିଓ ବିଜୟ କୃଷ୍ଣ ମଲିକ ସୂଚନା ଦେଇଛନ୍ତି। ଏଥିରେ ଆଇଆଇସି ଆରଏଚ କୁଲୁ, ସବଇନିସ୍ପେକ୍ଟର ବରୋଦା ପ୍ରସନ୍ନ ସାହୁ, ହିମାଂଶୁ ଶେଖର ପ୍ରଧାନ ଆଦି ଉପସ୍ଥିତ ଥିଲେ।
ଅଭିଯୁକ୍ତମାନଙ୍କ ମଧ୍ୟରେ ଝାଡଖଣ୍ଡ ଅଞ୍ଚଳର ଏମଡି ଖଲିଦ ଆନସାରୀ(୪୫) ଓ ଜୟନ୍ତୀଗଡ଼ ନିକଟ ବରଲା ଗ୍ରାମର କମଳାକାନ୍ତ ମହାନ୍ତ ଅରଫ ମଣ୍ଟୁ(୩୦)କୁ ଗିରଫ କରି କୋର୍ଟ ଚାଲାଣ କରାଯାଇଥିବା ଜଣାପଡ଼ିଛି। ସେମାନେ ଗୋଟିଏ ହିରୋହୋଣ୍ଡା ସ୍ପେଲଣ୍ଡର ମୋଟରସାଇକଲ ଜେଏଚ୧୧ଟି୮୯୮୨ ଯୋଗେ ଚମ୍ପୁଆ ଆଡୁ କୋଦଗାଡିଆ ଅଞ୍ଚଳକୁ ଯାଇଥିଲେ।
ସେଠାରେ ସେମାନେ ପ୍ରାୟତଃ ଲୋକମାନଙ୍କୁ ବନ୍ଧୁକ ଦେଖାଇଥିବା ନେଇ ଚମ୍ପୁଆ ପୁଲିସକୁ ଖବର ଦିଆଯାଇଥିଲା। ସଙ୍ଗେସଙ୍ଗେ ଚମ୍ପୁଆ ପୁଲିସ ସେଠାରେ ପହଞ୍ଚି ସେମାନଙ୍କୁ କାବୁ କରିନେଇଥିଲେ। ସେମାନଙ୍କୁ ସେଠାରୁ ଚମ୍ପୁଆ ପୁଲିସ ଗିରଫ କରିଥିଲେ। ଏ ସମ୍ବନ୍ଧରେ ଚମ୍ପୁଆ ଥାନା କେସ ନଂ ୧୩/୨୫, ୨୫(୧-କ) ଆସ୍ତ୍ର ଶସ୍ତ୍ର ନିରୋଧୀ ଆଇନରେ ମାମଲା ରୁଜୁ କରାଯାଇଥିବା ଜଣାପଡ଼ିଛି।
