ମୁମ୍ବଇ: ବଲିଉଡ଼ ଅଭିନେତା ସୈଫ୍ ଅଲୀ ଖାନଙ୍କ ଉପରେ ଆକ୍ରମଣ ମାମଲାରେ ୩ ସନ୍ଦିଗ୍ଧଙ୍କୁ ଅଟକ କରିଛି ପୁଲିସ। ଥାନାରେ ସେମାନଙ୍କୁ ପଚରାଉଚରା ଜାରି ରହିଛି। ଅଟକ ଥିବା ୩ ସନ୍ଦିଗ୍ଧ ଅଭିନେତାଙ୍କ ଘରର କର୍ମଚାରୀ ବୋଲି କୁହାଯାଉଛି। ବୁଧବାର ବିଳମ୍ବିତ ରାତିରେ ମୁମ୍ବଇର ବାନ୍ଦ୍ରା(ପଶ୍ଚିମ)ସ୍ଥିତ ତାଙ୍କ ଘରେ ଡକାୟତି ଉଦ୍ୟମରେ ଅଭିନେତାଙ୍କ ଉପରେ ଆକ୍ରମଣ କରିଥିଲେ ଦୁର୍ବୃତ୍ତ। ଖବର ଅନୁଯାୟୀ, ଘରର ସହାୟିକା ପ୍ରଥମେ ଚୋରଙ୍କୁ ଦେଖିଥିଲେ। ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା ଏବଂ ଯେତେବେଳେ ଅଭିନେତା ଆସି ସ୍ଥିତିକୁ ଶାନ୍ତ କରିବାକୁ ଚେଷ୍ଟା କରିଥିଲେ, ସେତେବେଳେ ଚୋର ତାଙ୍କୁ ଏକାଧିକ ଥର ଛୁରୀରେ ଆକ୍ରମଣ କରିଥିଲା।
ଆକ୍ରମଣକାରୀ ଘଟଣାସ୍ଥଳରୁ ଫେରାର ହୋଇଯାଇଛି। ରାତି ପ୍ରାୟ ୨ଟା ସମୟରେ ଏହି ଘଟଣା ଘଟିଛି। ଅଭିନେତାଙ୍କୁ ଭୋର ୩ଟା ୩୦ ସମୟରେ ଲୀଲାବତୀ ହସ୍ପିଟାଲରେ ଭର୍ତ୍ତି କରାଯାଇଥିଲା। ତାଙ୍କର ଅସ୍ତ୍ରୋପଚାର କରାଯାଉଥିବା ଜଣାପଡ଼ିଛି। ସୂଚନା ଅନୁସାରେ, ସୈଫ୍ଙ୍କ ଶରୀରର ୬ଟି ସ୍ଥାନରେ ଆଘାତ ଲାଗିଛି, ସେଥି ମଧ୍ୟରୁ ଦୁଇଟି ସ୍ଥାନରେ ଗଭୀର ଆଘାତ ଲାଗିଛି।
