ଫୁଲବାଣୀ: ସ୍ଥାନୀୟ ବିଜୁ ପଟ୍ଟନାୟକ ବୈଷୟିକ ଅନୁଷ୍ଠାନରେ ପଢୁଥିବା ଜଣେ ଛାତ୍ରଙ୍କୁ ଛୁରୀ ଦେଖାଇ ଟଙ୍କା ଓ ମୋବାଇଲ ଫୋନ ଲୁଟିବା ମାମଲାରେ ବୁଧବାର ଟାଉନ ଥାନା ପୁଲିସ ୩ ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି। ମଙ୍ଗଳବାର ରାତିରେ ଦୁର୍ବୃତ୍ତମାନେ ଏହି ଲୁଟ୍ କରିଥିଲେ। ଗିରଫ ଅଭିଯୁକ୍ତମାନେ ହେଲେ ସ୍ଥାନୀୟ ମୁଣ୍ଡିଆ ସାହିର ଶିବ ନାୟକ(୧୯) ଓ ରାଜେଶ ନାୟକ(୧୯) ଏବଂ ଗୋଚ୍ଛାପଡା ଥାନା କଟ୍ରିଙ୍ଗିଆର ଦୀପକ ଦିଗାଲ(୧୯)।
ସୂଚନା ଅନୁଯାୟୀ, ବିପିଆଇଟିର ଛାତ୍ର ସୁନୀଲ ସ ଗତକାଲି ରାତିରେ ନିଜ ଭାଇ ଓ କିଛି ସାଙ୍ଗଙ୍କ ସହିତ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଆସିଥିଲେ। ସେଠାରୁ ଫେରିବା ସମୟରେ ଏଜେଓ ହାଇସ୍କୁଲ ନିକଟରେ ଅଭିଯୁକ୍ତମାନେ ଏକ ଛୁରୀ ଦେଖାଇ ସେମାନଙ୍କୁ ଡରାଇବା ସହିତ ମୋବାଇଲ ଫୋନ ଓ ଟଙ୍କା ଛଡାଇ ନେଇଥିଲେ। ଏନେଇ ସୁନୀଲ ଟାଉନ ଥାନାରେ ଏତଲା ଦେବାପରେ ପୁଲିସ ବିଭିନ୍ନ ସ୍ଥାନରେ ଚଢ଼ାଉ କରି ବୁଧବାର ଅଭିଯୁକ୍ତମାନଙ୍କୁ ଗିରଫ କରିବା ସହିତ ସେମାନଙ୍କ ପାଖରୁ ମୋବାଇଲ ଓ ଟଙ୍କା ଜବତ କରିଛି। ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇଥିବା ଟାଉନ ଥାନା ଅଧିକାରୀ ପି ସ୍ବରୂପ କିଶନ ସୂଚନା ଦେଇଛନ୍ତି। ମାମଲାର ଅଧିକ ତଦନ୍ତ ଚାଲିଥିବା ତଦନ୍ତ ଅଧିକାରୀ ମନୋରଞ୍ଜନ ଭୋଇ ପ୍ରକାଶ କରିଛନ୍ତି।
