‘ମହାବତାର ନରସିହ୍ମା’: ଆସିଲା ଟିଜର, ବଢିଲା ଉତ୍ସାହ

ସମାଜ ଡିଜିଟାଲ ଡେସ୍କ: ‘ମହାବତାର ନରସିହ୍ମା’ର ବହୁପ୍ରତୀକ୍ଷିତ ଟିଜର ମକର ସଂକ୍ରାନ୍ତି ଅବସରରେ ମଙ୍ଗଳବାର ରିଲିଜ୍‌ ହୋଇଛି। ଏହାର ଝଲକ୍‌ ଦେଖିବାପରେ ସାମାଜିକ ଗଣମାଧ୍ୟମରେ ଲଗାତର ଫିଲ୍ମକୁ ନେଇ ଚର୍ଚ୍ଚା ଜାରି ରହିଛି। ‘କେଜିଏଫ’, ‘କାନ୍ତାରା’ ଓ ‘ସାଲାର’ ଭଳି ହିଟ୍‌ ଚଳଚ୍ଚିତ୍ର ନିର୍ମାଣ କରିଥିବା ପ୍ରଡକ୍ସନ ହାଉସ ଏହି ଫିଲ୍ମ ନିର୍ମାଣ କରିଛି। ଅଶ୍ଵିନ କୁମାର ନିର୍ଦେଶିତ ଏହି ୩-ଡି ଆନିମେସନ୍‌ ଫିଲ୍ମ ଚଳିତ ବର୍ଷ ଏପ୍ରିଲ ୩ରେ ମୁକ୍ତିଲାଭ କରିବ।

‘ମହାବତାର ନରସିହ୍ମା’ ଏକ ଐତିହାସିକ ତଥା ପୌରାଣିକ କାହାଣୀ, ଯାହା ପ୍ରଭୁ ବିଷ୍ଣୁଙ୍କ ନରସିଂହ ଅବତାର ଓ ଭକ୍ତ ପ୍ରହ୍ଲାଦ ଉପରେ ଆଧାରିତ ଏକ ଚଳଚ୍ଚିତ୍ର। ହିନ୍ଦୀ, କନ୍ନଡ଼, ତାମିଲ, ତେଲୁଗୁ ଓ ମାଲାୟାଲମ ସହିତ ଅନେକ ଭାରତୀୟ ଭାଷାରେ ଥ୍ରୀଡିରେ ମୁକ୍ତିଲାଭ କରିବ ‘ମହାବତାର ନରସିହ୍ମା’।