ପାଟଣା : ପର୍ଯ୍ୟଟକଙ୍କ ପାଇଁ ଖୁସି ଖବର। କେନ୍ଦୁଝର ଜିଲ୍ଲା ଘଟଗାଁରେ ଉଦଘାଟିତ ହୋଇଛି ଅଟେଇ ଜଙ୍ଗଲ ସଫାରୀ । କେନ୍ଦୁଝର ଜିଲ୍ଲା ବନବିଭାଗ ପକ୍ଷରୁ ପର୍ଯ୍ୟଟକଙ୍କୁ ଆକୃଷ୍ଟ କରିବା ସହିତ ଅଟେଇ ଜଙ୍ଗଲ ସଫାରୀର ଅନୁଭୂତି ସାଉଁଟିବା ପାଇଁ ଏବଂ ସ୍ବତନ୍ତ୍ର ସଫାରୀ ଗାଡ଼ିରେ ପର୍ଯ୍ୟଟକ ମାନଙ୍କୁ ବୁଲିବାର ବ୍ୟବସ୍ଥା କରିଛି ବନବିଭାଗ । ଉଦଘାଟନ ଉତ୍ସବରେ ମୁଖ୍ୟ ଅତିଥି ଭାବେ କେନ୍ଦୁଝର ସାଂସଦ ଅନନ୍ତ ନାୟକ , ସମ୍ମାନୀତ ଅତିଥି ଭାବେ ଆନନ୍ଦପୁର ବିଧାୟକ ଅଭିମନ୍ୟୁ ସେଠୀ, ଜିଲ୍ଲା ପରିଷଦ ଅଧ୍ୟକ୍ଷା ସାଗରୀକା ସାହୁ, କେନ୍ଦୁଝର ଡିଏଫଓ ଏଚଡି ଧନରାଜ ପ୍ରମୁଖ ଯୋଗଦେଇ ଏହାକୁ ଉଦଘାଟନ କରିଥିଲେ । ଏବେ ଅଟେଇ ଘଞ୍ଚ ଜଙ୍ଗଲରେ ସଫାରୀର ମଜା ନେଇ ପାରିବେ ଘଟଗାଁ ଆସୁଥିବା ପର୍ଯ୍ୟଟକମାନେ ।
କେନ୍ଦୁଝର ଜିଲ୍ଲାର ଘଟଗାଁ ମା’ ତାରିଣୀଙ୍କ ମନ୍ଦିରକୁ ପ୍ରତେକ ଦିନ ଆସୁଥିବା ପର୍ଯ୍ୟଟକ ଏବେ ସଫାରୀ ଗାଡ଼ିରେ ବସି ବନ୍ୟଜନ୍ତୁ ଦେଖିବାର ମଜା ନେଇପାରିବେ ବୋଲି ବନ ବିଭାଗ ପକ୍ଷରୁ ସୂଚନା ଦିଆଯାଇଛି । ଅଟେଇ ଜଙ୍ଗଲ ସଫାରୀ ଗାଡ଼ିରେ ପର୍ଯ୍ୟଟକମାନେ ଜଙ୍ଗଲ ଭିତରକୁ ସଫାରୀ କରିବା ପାଇଁ ବନ ବିଭାଗ ଦ୍ବାରା ଏସି ଗାଡି ୨୫୦ଟଙ୍କା ଓ ନନ୍ ଏସି ଗାଡି ପାଇଁ ଜଣ ପ୍ରତି ୨୦୦ଟଙ୍କା ଦେୟ ରଖାଯାଇଛି। ପର୍ଯ୍ୟଟକମାନେ ଏହି ଅଟେଇ ଜଙ୍ଗଲ ସଫାରିରେ ହାତୀ, ଭାଲୁ , ହରିଣ, ବାରାହା,ବିଭିନ୍ନ ପ୍ରଜାତିର ବନ୍ୟପ୍ରାଣୀ ଦେଖିପାରିବାର ସୁଯୋଗ ପାଇବେ। ଏଥି ସହିତ ୱାଚ ଟାୱାର , ଭିୟୁପଏଣ୍ଟ , ଦରଗଡଶିଳା ଡ୍ୟାମ ବୁଲି ଦେଖିବା ସହ ଜଙ୍ଗଲ ଭ୍ରମଣର ମଜା ନେଇପାରିବେ ।
