ଝାରସୁଗୁଡ଼ା : ଝାରସୁଗୁଡ଼ାରେ ଗୁରୁବାର ବିଭିନ୍ନ ସରକାରୀ ପ୍ରକଳ୍ପ ଉଦଘାଟନ କରିବା ସହ ଭିତ୍ତିପ୍ରସ୍ତର ସ୍ଥାପନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ମିଳିଥିବା ଖବର ଅନୁସାରେ, ୬୧୮କୋଟି ୬୬ଲକ୍ଷ ଟଙ୍କା ବ୍ୟୟ ଅଟକଳରେ ବିଭିନ୍ନ ପ୍ରକଳ୍ପର ଉଦଘାଟନ କରାଯାଇଛି।
ଏହାପରେ ଅମଲିପାଲ୍ଲୀରେ ଆୟୋଜିତ ଏହି ସଭାରେ ମୁଖ୍ୟମନ୍ତ୍ରୀ ନିଜ ଅଭିଭାଷଣରେ କହିଛନ୍ତି, “ଆଜି ୬ଶହ କୋଟି ଟଙ୍କାର ପ୍ରକଳ୍ପ ଘୋଷଣା କରାଗଲା। ଆଗକୁ ଝାରସୁଗୁଡ଼ାର ଆହୁରି ଉନ୍ନତି ହେବ। ଆପଣଙ୍କୁ ନେଇ ଝାରସୁଗୁଡ଼ା ଆଗକୁ ଯିବ”। ସେ ପୁନର୍ବାର କହିଛନ୍ତି, “ଶତାବ୍ଦୀ ଏକ୍ସପ୍ରେସ ଓ କୋଇଲା ରୟାଲିଟି ପାଇଁ କେନ୍ଦ୍ର ନିକଟରେ ଦାବି କରାଯାଇଛି, କିନ୍ତୁ ଏଥିପ୍ରତି କେନ୍ଦ୍ର ସରକାର କର୍ଣ୍ଣପାତ କରୁନାହାନ୍ତି”।
ଏଥିସହିତ ଏହି ସମାରୋହରେ ନିକଟରେ କଂଗ୍ରେସରୁ ଇସ୍ତଫା ଦେଇଥିବା ଝାରସୁଗୁଡ଼ା ବିଧାୟକ ନବ ଦାସ ଆନୁଷ୍ଠାନିକ ଭାବେ ବିଜେଡ଼ିରେ ସାମିଲ ହୋଇଛନ୍ତି। ବିଜେଡ଼ିରେ ଯୋଗ ଦେଇଥିବାରୁ ସଭାରେ ନବଙ୍କୁ ମୁଖ୍ୟମନ୍ତ୍ରୀ ଅଭିନନ୍ଦନ ଜଣାଇଛନ୍ତି।