ସମାଜ ଡିଜିଟାଲ ଡେସ୍କ: ମହାରାଷ୍ଟ୍ରର ନୂଆ ମୁଖ୍ୟମନ୍ତ୍ରୀଙ୍କ ନାବ ବୁଧବାର ଘୋଷଣା କରାଯାଇଛି। ସର୍ବସମ୍ମତିକ୍ରମେ ଦେବେନ୍ଦ୍ର ଫଡନବିସଙ୍କ ନାମକୁ ମୁଖ୍ୟମନ୍ତ୍ରୀ ଭାବେ ଘୋଷଣା କରାଯାଇଛି। ଫଡନବିସ ୩ୟ ଥର ଲାଗି ମହାରାଷ୍ଟ୍ର ମୁଖ୍ୟମନ୍ତ୍ରୀ ଭାବେ ଗୁରୁବାର ଶପଥ ଗ୍ରହଣ କରିବେ। ତେବେ ଏକନାଥ ସିନ୍ଦେଙ୍କୁ ନେଇ ସସପେନ୍ସ ଜାରି ରହିଥିଲା। ଫଡନବିସ ମୁଖ୍ୟମନ୍ତ୍ରୀ ହେଲେ ସିନ୍ଦେଙ୍କୁ ଉପମୁଖ୍ୟମନ୍ତ୍ରୀ ପଦ ମିଳିପାରେ ବୋଲି ଚର୍ଚ୍ଚା ହେଉଥିଲା। ଏହା ଉପରୁ ମଧ୍ୟ ବୁଧବାର ପରଦା ଉଠିଛି। ସିନ୍ଦେ ଉପମୁଖ୍ୟମନ୍ତ୍ରୀ ହେବା ସ୍ପଷ୍ଟ ହୋଇଛି। ପ୍ରଥମରୁ ସେ ମନା କରିଆସୁଥିଲେ। କିନ୍ତୁ ଫଡନବିସ ତାଙ୍କୁ ବାରମ୍ବାର ଅନୁରୋଧ କରିବା ପରେ ସେ ରାଜି ହୋଇଥିବା ବିଶେଷ ସୂତ୍ରରୁ ସୂଚନା ମିଳିଛି।
ବୁଧବାର ସିନ୍ଦେ ଶିବସେନା ନେତାମାନଙ୍କ ସହିତ ବୈଠକ କରିଥିଲେ। ସରକାରରେ ସେ ସାମିଲ ହେବେ ନା ନାହିଁ ସେ ବିଷୟରେ ସନ୍ଧ୍ୟାରେ ସୂଚନା ଦେବେ ବୋଲି ସିନ୍ଦେ ବୈଠକରେ ନିଜ ନେତାମାନଙ୍କୁ କହିଥିଲେ। କିନ୍ତୁ ବୈଠକରେ ନେତାମାନେ ତାଙ୍କୁ ସରକାରରେ ରହିବାକୁ ବହୁ ଅନୁରୋଧ କରିଥିଲେ। ଫଡନବିସ ବି ସିନ୍ଦେଙ୍କୁ ସରକାରରେ ରହିବାକୁ ଅନୁରୋଧ କରିଥିଲେ। ଶେଷରେ ସିନ୍ଦେ ରାଜି ହୋଇଥିବା ଜଣାପଡ଼ିଛି। ତେବେ ସିନ୍ଦେ ଉପମୁଖ୍ୟମନ୍ତ୍ରୀ ହେଲେ ତାଙ୍କୁ କେଉଁ ବିଭାଗ ମିଳିବ ତାହା ସ୍ପଷ୍ଟ ହୋଇନାହିଁ। ମାତ୍ର ଆରମ୍ଭରୁ ଶିବସେନା ଗୃହ ବିଭାଗ ନିଜ ଅଧୀନରେ ରଖିବାକୁ ଦାବି କରିଆସୁଛି।
ସେହିପରି ମହାୟୁତିର ଅନ୍ୟତମ ସହଯୋଗୀ ଏନସିପି ମୁଖ୍ୟ ଅଜିତ ପାଓ୍ବାର ବି ଉପମୁଖ୍ୟମନ୍ତ୍ରୀ ପଦବୀ ପାଇବାର ସମ୍ଭାବନା ରହିଛି। ଦୁଇ ଉପମୁଖ୍ୟମନ୍ତ୍ରୀଙ୍କ ସହିତ ଫଡନବିସ ଗୁରୁବାର ସନ୍ଧ୍ୟା ସାଢ଼େ ୫ଟାରେ ଶପଥ ନେବାର କାର୍ଯ୍ୟକ୍ରମ ରହିଛି।
