ଧାମରା: ଧାମରା ନିକଟସ୍ଥ ଜାଗୁଳା ପଂଚାୟତ ପାଇକ ସାହିଠାରେ ଏକ କଲଭର୍ଟ ନିର୍ମାଣ ନ ହେବାରୁ ଶହ ଶହ ଏକର ଚାଷ ଜମିରେ ଏପର୍ଯ୍ୟନ୍ତ ଧାନ କଟାଯାଇ ପାରୁନାହିଁ। ଏମିତି ଏକ ଅଭିଯୋଗ ଆସିଛି ଜାଗୁଳା ପଂଚାୟତ ସାଗରବେଳା ମହିଳା ମହାସଂଘ ତରଫରୁ। ପ୍ରାପ୍ତ ଖବର ଅନୁଯାୟୀ, ଜାଗୁଳା ପଂଚାୟତ ପାଇକ ସାହିଠାରେ ଥିବା ଏକ ନାଳର ପୂର୍ବ ପାର୍ଶ୍ବରେ ଶହ ଶହ ଏକର ଚାଷଜମି ଅଛି। ଏହି ଚାଷ ଜମିକୁ ଯାତାୟତ କରିବା ପାଇଁ କୌଣସି କଲଭର୍ଟ ନ ଥିବାରୁ ବହୁ ଚାଷୀ ଅସୁବିଧାର ସମ୍ମୁଖୀନ ହୋଇ ଚାଷ କରିଥିଲେ। ଧାନ ଅମଳ ସମୟରେ ଏହି ଚାଷୀମାନେ ଧାନ କାଟି ଅମଳ କରିବାକୁ ନିଜ ଖଳାକୁ ଆଣିବା ସମ୍ଭବପର ହୋଇପାରୁ ନଥିବାବେଳେ ଏହି ସମସ୍ୟା ନେଇ ଜାଗୁଳା ସାଗରବେଳା ମହିଳା ମହାସଂଘ ଭଦ୍ରକ ଜିଲାପାଳ, ଜଳ ନିଷ୍କାସନ ବିଭାଗ, ଚାନ୍ଦବାଲି ତହସିଲଦାରଙ୍କୁ ଲିଖିତ ଅଭିଯୋଗ କରିଛି। ଏହି ସମସ୍ୟାର ସମାଧାନ ନହେଲେ ସଂପୃକ୍ତ ମହିଳା ମହସଂଘ ଧାମରା-ଜାମୁଝାଡ଼ି ରାସ୍ତାକୁ ୨୫ତାରିଖ ଦିନ ଅବରୋଧ କରିବେ ବୋଲି ମଧ୍ୟ ଲିଖିତ ଅଭିଯୋଗ କରିଛନ୍ତି। ମାତ୍ର କେନ୍ଦ୍ର ସରକାରଙ୍କ ଏକ ୨ଜଣିଆ ଟିମ୍ ଦାନା ବାତ୍ୟାର କ୍ଷୟକ୍ଷତି ଆକଳନ ପାଇଁ ଧାମରା ଆସୁଥିବାରୁ ଜିଲାପ୍ରଶାସନ ସଂପୃକ୍ତ ମହିଳା ମହାସଂଘର ଏପରି ଚରମ ନିଷ୍ପତ୍ତିରୁ କ୍ଷାନ୍ତ ରହିବା ପାଇଁ କହିବା ସହ ତୁରନ୍ତ ଏହି କଲଭର୍ଟ କାର୍ଯ୍ୟ କରିବେ ବୋଲି ମୌଖିକ ପ୍ରତିଶ୍ରୁତି ଦେଇଥିଲେ। ଏହି ପରିପ୍ରେକ୍ଷୀରେ ସାଗରବେଳା ମହିଳା ମହାସଂଘ ନିଜ ନିଷ୍ପତ୍ତିରୁ ଓହରି ଯାଇଥିବାବେଳେ ଡିସେମ୍ବର ୧୫ ତାରିଖ ମଧ୍ୟରେ ଯଦି ଏହି କଲଭର୍ଟ ନିର୍ମାଣ କରା ନଯାଏ ପୁନଶ୍ଚ ସେମାନେ ରାଜରାସ୍ତାକୁ ଓହ୍ଲାଇ ଏହାର ପ୍ରତିବାଦ କରିବେ ଏବଂ ଯେଉଁ ଚାଷୀମାନଙ୍କର ଧାନ ବିଲରେ ପଡ଼ି ନଷ୍ଟ ହେଉଛି ସେମାନଙ୍କୁ କ୍ଷତିପୂରଣ ଦେବାକୁ ସରକାର ବାଧ୍ୟ ହେବେ ନଚେତ ଏହାର ପରିଣାମ ପାଇଁ ଭଦ୍ରକ ଜିଲାପାଳ ଦାୟୀ ରହିବେ ବୋଲି ମହିଳା ମହାସଂଘର ସଭାନେତ୍ରୀ ଏବଂ ସଂପାଦିକା ଚେତାବନୀ ଦେଇଛନ୍ତି।
