ଖୋ ଖୋ ଖେଳରେ ଆଠଗଡ ଝିଅର କୃତିତ୍ବ

ଆଠଗଡ: ସଂପ୍ରତି ପଶ୍ଚିମବଙ୍ଗର ହଳଦିଆ ପୂର୍ବ ମେଦିନୀପୁରଠାରେ ଚଳିତ ମାସ ୨୫ରୁ ୩୦ ତାରିଖ ପର୍ଯ୍ୟନ୍ତ ପୂର୍ବ ଓ ଉତ୍ତର-ପୂର୍ବ ଜୋନର ଅସ୍ମିତା ଖେଲୋ ଇଣ୍ଡିଆ ଖୋ-ଖୋ ପ୍ରତିଯୋଗିତା ଆୟୋଜିତ ହୋଇଯାଇଛି। ଏହି ପ୍ରତିଯୋଗିତାରେ ଓଡିଶାର କନିଷ୍ଠ ବର୍ଗ ଓ ସର୍ବକନିଷ୍ଠ ବର୍ଗ ଦଳ ଚମ୍ପିଆନ ହୋଇ ସ୍ଵର୍ଣ୍ଣ ପଦକ ହାସଲ କରି ରାଜ୍ୟ ପାଇଁ ଗୌରବ ଆଣିଛନ୍ତି। ସର୍ବକନିଷ୍ଠ ବର୍ଗ ଦଳରେ ଆଠଗଡ ବ୍ଲକର କନ୍ଦରପୁର ଗ୍ରାମର ୮ମ ଶ୍ରେଣୀ ଛାତ୍ରୀ ତୁଳସୀ ନାୟକ ବେଶ ଉନ୍ନତ ଖେଳ ପ୍ରଦର୍ଶନ କରି ଦଳର ବିଜୟରେ ପ୍ରମୁଖ ଭୂମିକା ଗ୍ରହଣ କରିଥିଲେ। ତୁଳସୀ ବୁଧବାର ଏଠାକୁ ଫେରିବା ପରେ ତାଙ୍କୁ ଆଠଗଡ ଖୋ-ଖୋ ଆସୋସିଏସନ ସଭାପତି ଲକ୍ଷୀନାରାୟଣ ଭଞ୍ଜ, ପ୍ରଶିକ୍ଷକ ଯଶୋବନ୍ତ ରାଉତ, ସଞ୍ଜୟ କୁମାର ବେହେରା, କନ୍ଦରପୁର ନୋଡାଲ ଉପ୍ରା ବିଦ୍ୟାଳୟର ପୂର୍ବତନ ପ୍ରଧାନଶିକ୍ଷକ ତୀରଥବାସୀ ସାହୁଙ୍କ ସମେତ ସେ ପଢୁଥିବା ଉକ୍ତ ସ୍କୁଲର ସମସ୍ତ ଶିକ୍ଷକ/ଶିକ୍ଷୟିତ୍ରୀ ଏବଂ ଗ୍ରାମର ମୁରବୀ ପୁଷ୍ପଗୁଚ୍ଛ ଦେଇ ସମ୍ବର୍ଦ୍ଧିତ କରିଥିଲେ । ଆଗକୁ ଆହୁରି ଉନ୍ନତ ଖେଳ ପ୍ରଦର୍ଶନ କରି ଜାତୀୟସ୍ତରରେ ସଫଳତା ହାସଲ କରିବାକୁ ସେ ଲକ୍ଷ୍ୟ ରଖିଛନ୍ତି ବୋଲି ତୁଳସୀ ତାଙ୍କ ପ୍ରତିକ୍ରିୟାରେ କହିଛନ୍ତି।