ଡେସ୍କ: ସମ୍ପ୍ରତି କେନ୍ଦ୍ରାପଡା ଜିଲ୍ଲା ଡେରାବିଶ ବ୍ଲକର ସିଡିପିଓ ସ୍ନେହଲତା ସାହୁଙ୍କ ବେପରୁଆ ଓ ଅମାନବୀୟ ବ୍ୟବହାର ଯୋଗୁ ଗର୍ଭସ୍ଥ ଶିଶୁର ମୃତ୍ୟୁ ହେବା ସହ ଗର୍ଭବତୀ ମା’ ଗୁରୁତର ହେବା ଘଟଣାରେ ତଦନ୍ତ ନିର୍ଦ୍ଦେଶ ଦିଆଯାଇଛି। ତେବେ ତଦନ୍ତର ଦିଗ କୁଆଡେ ଯିବ ତାହା ତ ସମୟ କହିବ। କିନ୍ତୁ ଘଟଣା ଲୋକଲୋଚନକୁ ଆସିବାର ୨୪ ଘଣ୍ଟା ନ ପୂରୁଣୁ, ସ୍ନେହଲତାଙ୍କ କଳା କାରନାମା ସମ୍ପର୍କରେ ସ୍ଥାନୀୟ ଜନସାଧାରଣ କହିଛନ୍ତି।
ସ୍ଥାନୀୟ ଜନସାଧାରଣଙ୍କ ଠାରୁ ମିଳିଥିବା ସୂଚନା ଅନୁଯାୟୀ, ସିଡିପିଓ ସ୍ନେହଲତା ସାହୁ ଅଙ୍ଗନବାଡି କେନ୍ଦ୍ରଗୁଡିକୁ ଦିଆଯାଉଥିବା ବିଭିନ୍ନ ସାମଗ୍ରୀ କ୍ଷେତ୍ରରେ ଯୋଗାଣକାରୀମାନଙ୍କ ଠାରୁ ଲକ୍ଷାଧିକ ଟଙ୍କା ଲାଞ୍ଚ ନିଅନ୍ତି। କୁହାଯାଉଛି ଯେ, ରାଜନୈତିକ ଛତ୍ରଛାୟା ତଳେ ରହି ସ୍ନେହଲତା ନିଜକୁ ଅଧିକ କ୍ଷମତାଶାଳୀ ମନେ କରୁଥିଲେ। ଫଳରେ ସେ କାହାକୁ ଭୟ କରୁନଥିଲେ। ଉପରିସ୍ଥ ଅଧିକାରୀମାନେ ମଧ୍ୟ ସିଡିପିଓଙ୍କୁ କିଛି କହିବାକୁ କିମ୍ବା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାହସ କରୁନଥିଲେ।
ଅନ୍ୟପକ୍ଷରେ ସିଡିପିଓ ସ୍ନେହଲତା ମଧ୍ୟ ପୀଡିତା କିରାଣୀ ବର୍ଷା ପ୍ରିୟଦର୍ଶିନୀଙ୍କୁ ଅନେକ ଥର ଅଫିସ ମଧ୍ୟରେ ଓ ଅନ୍ୟମାନଙ୍କ ଉପସ୍ଥିତିରେ ଗାଳିଗୁଲଜ କରିଥିବା ଜଣାପଡିଛି। ନିଜ ନାଁ ପ୍ରକାଶ ନ କରି ସେହି କାର୍ଯ୍ୟାଳୟର ଜଣେ କର୍ମଚାରୀ କହିଛନ୍ତି ଯେ ସିଡିପିଓ ଅଧସ୍ତନ କର୍ମଚାରୀମାନଙ୍କୁ ଗାଳିଗୁଲଜ କରିବା ସହ ଅଙ୍ଗନବାଡି କର୍ମୀମାନଙ୍କୁ ‘ତୁ…ତା’ କହି ବ୍ୟବହାର କରୁଥିଲେ।
