ସ୍ବାମୀ ଦେଇନଥିଲେ ୨୫ହଜାର ଜରିମାନା, ସ୍ତ୍ରୀ ମୃତଦେହକୁ ସତ୍କାର ପାଇଁ ଅନୁମତି ଦେଲେନି ଗ୍ରାମବାସୀ

ବାଙ୍ଗିରିପୋଷି: ସ୍ବାମୀ ୨୫ହଜାର ଟଙ୍କା ଜରିମାନା ଦେଇନଥିବାରୁ ସ୍ତ୍ରୀଙ୍କ ସତ୍କାର ପାଇଁ ଗ୍ରାମାବାସୀ ଅନୁମତି ଦେଇନାହାନ୍ତି। ଟଙ୍କା ଜରିମାନା ଦେବାପରେ ସ୍ତ୍ରୀଙ୍କ ମୃତଦେହ ସତ୍କାର କରିପାରିବେ ବୋଲି ରୋକଠୋକ ଶୁଣାଇଥିଲେ ଗ୍ରାମବାସୀ। ଫଳରେ ମୃତଦେହଟି ସତ୍କାର ହୋଇନପାରି ରାସ୍ତାରେ ପଡ଼ି ରହିଥିବା ଦେଖିବାକୁ ମିଳିଥିଲା।

ବାଙ୍ଗିରିପୋଷି ଥାନା ଅନ୍ତର୍ଗତ ଦିଘି ଗ୍ରାମ ପଞ୍ଚାୟତ ଦୋରକଣ୍ଟିଆ ଗ୍ରାମରେ ସୃଷ୍ଟି ହେଇଛି ଅଭାବନୀୟ ପରିସ୍ଥିତି। ପୂର୍ବରୁ ଗ୍ରାମରେ କରାଯାଇଥିବା ୨୫ ହଜାର ଟଙ୍କା ଜରିମାନା ଦେଇ ନଥିବାରୁ ମୃତଦେହ ସଂସ୍କାର ଲାଗି ଗ୍ରାମବାସୀ ବାରଣ କରିଥିଲେ। ଏହି ଘଟଣାକୁ ନେଇ ଗ୍ରାମବାସୀମାନେ୨୪ ଘଣ୍ଟା ରୁ ଉର୍ଦ୍ଧ୍ବ ସମୟ ଧରି ମୃତଦେହ ଅଟକ ରଖିଥିଲେ। ଖବର ପାଇ ବାଙ୍ଗିରିପୋଷି ଥାନା ଅଧିକାରୀ ରୋଜାଲିନ ବେହେରା ଏବଂ ଅତିରିକ୍ତ ତହସିଲଦାର ଦାମୋଦର ପ୍ରଧାନ ଘଟଣା ସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିଥିଲେ ମଧ୍ୟ ଗ୍ରାମବାସୀମାନେ ନିଜ ଜିଦରେ ଅଟଳ ରହି ମୃତଦେହ ସତ୍କାର ପାଇଁ ଅନୁମତି ଦେଇନଥିଲେ। ଫଳରେ ରାସ୍ତା ଉପରେ ମୃତଦେହ ପଡ଼ି ରହିଥିଲା।

ମିଳିଥିବା ସୂଚନା ମୁତାବକ, ଗ୍ରାମର ସୁନ୍ଦର ମୋହନ ମାର୍ଣ୍ଡିଙ୍କର ସ୍ତ୍ରୀ ସାକ୍ରମଣି ମାର୍ଣ୍ଡି ଗତ ୨୩ ତାରିଖ ସଂଧ୍ୟା ୬ (ଛଅ) ଟା ସମୟରେ ମୃତ୍ୟୁବରଣ କରିଥିଲେ । ତେବେ ପୂର୍ବରୁ ଶ୍ରୀ ମାର୍ଣ୍ଡିଙ୍କୁ ଆଦିବାସୀ ସମାଜ ନିୟମ ଅନୁସାରେ ଜରିମାନା କରିଥିବା ୨୫ ହଜାର ଟଙ୍କା ଦେଇ ନଥିବା ଦର୍ଶାଇ ଗ୍ରାମବାସୀମାନେ ଠେଙ୍ଗା, ବାଡି ଧରି ମୃତଦେହକୁ ସତ୍କାର ପାଇଁ ଛାଡି ନ ଥିଲେ।  ଅନ୍ୟପକ୍ଷେ ମୃତକଙ୍କ ପରିବାର ଲୋକଙ୍କୁ ଜାଣିଶୁଣି ଜୋରିମାନା କରିବା ସହ ସାମାଜିକ ବାସନ୍ଦର ଭୟ ଦେଖାଇ ହଇରାଣ କରାଯାଉଛି ବୋଲି ବାଙ୍ଗିରିପୋଷି ସେଙ୍ଗେଲ୍ ଅଭିଯାନ ତରଫରୁ ଅଭିଯୋଗ ହୋଇଛି।