ପାଟଣା : ଓଡ଼ିଶା ଉପକୂଳରେ ମାଡ଼ ହେବାକୁ ଥିବା ସମ୍ଭାବ୍ୟ ବାତ୍ୟା ‘ଦାନା’ ପାଇଁ ଆଜି ପୂର୍ବାହ୍ନରେ ପାଟଣା ବ୍ଲକ କାର୍ଯ୍ୟାଳୟରେ ବିଭିନ୍ନ ବିଭାଗୀୟ ଅଧିକାରୀଙ୍କୁ ନେଇ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଛି। ସମ୍ଭାବ୍ୟ ବାତ୍ୟାର ସାମ୍ପ୍ରତିକ ସ୍ଥିତି ଓ ଗତିପଥ ଉପରେ ତୀକ୍ଷଣ ନଜର ରଖାଯାଇଛି ବୋଲି ବିଡ଼ିଓ ଶିବ ଶଙ୍କର ମୁର୍ମୁ ସୂଚନା ଦେଇଥିଲେ। ବିଭିନ୍ନ ପଞ୍ଚାୟତରେ ତଳିଆ ଅଞ୍ଚଳ ଓ ଚାଳ ଘରେ ବିପଦସଂକୁଳ ଭାବେ ରହୁଥିବା ଜନସାଧାରଣଙ୍କୁ ନିକଟସ୍ଥ ବିଦ୍ୟାଳୟ, ଅଙ୍ଗନୱାଡି କେନ୍ଦ୍ର ଓ ରାଜୀବ ଗାନ୍ଧୀ ସେବାଗୃହକୁ ଅସ୍ଥାୟୀ ଭାବେ ଆଣି ଥଇଥାନ କରିବାକୁ ଆଲୋଚନା ହୋଇଥିଲା।
ସେହିପରି ବିଦ୍ୟୁତ ସରବରାହ ପୁନଃ କାର୍ଯ୍ୟକ୍ଷମ, ବିଶୁଦ୍ଧ ପାନୀୟ ଜଳ ଉପଲବ୍ଧ, ଗର୍ଭବତୀ ମହିଳାଙ୍କ ଯତ୍ନ, ପରିସ୍ଥିତି ଉପୁଜିଲେ ଶୁଖିଲା ଓ ରନ୍ଧା ଖାଦ୍ୟ ପ୍ରଦାନ ଏବଂ ସାପକାମୁଡ଼ା ପ୍ରତି ସତର୍କତା ଆଦି ବିଷୟରେ ବିଧିବଦ୍ଧ ଆଲୋଚନା ହୋଇଥିଲା। ଏହି ବୈଠକରେ ବିଡ଼ିଓ ମୁର୍ମୁଙ୍କ ବ୍ୟତୀତ ଅଧ୍ୟକ୍ଷା ସୁକାନ୍ତି ନାଏକ, ଡ଼ାକ୍ତର ନିରଞ୍ଜନ ସାହୁ, ଏବିଡ଼ିଓ ଚିତ୍ତରଞ୍ଜନ ନାୟକ,ଅତିରିକ୍ତ ତହସିଲଦାର ଶରଣ କୁମାର ଜେନା, ବିଇଓ ପୂର୍ଣ୍ଣଚନ୍ଦ୍ର ଅମାତ, ଜିପିଡ଼ିଓ ରଶ୍ମିରେଖା ମହାନ୍ତି, ଏପିଓ ଦୀପକ ବେହେରା, ହିସାବ ଅଧିକାରୀ ପାର୍ବତୀ ସର୍ଦ୍ଦାର, ସେକ୍ସନ ଅଫିସର ପ୍ରଭାତ କୁମାର ନାଥ, ଯୋଗାଣ ଅଧିକାରୀ ସୁନୀତା ମାରାଣ୍ଡି ଓ ଅଗ୍ନିଶମ ତଥା ବିଦ୍ୟୁତ ବିଭାଗର ଅଧିକାରୀମାନେ ଯୋଗ ଦେଇଥିଲେ।
