ସମ୍ବଲପୁର: ଦଶହରା ଉତ୍ସବ ସମୟରେ ସ୍ଥାନୀୟ କ୍ଷେତରାଜପୁର ଥାନା ଅନ୍ତର୍ଗତ ଅଞ୍ଚଳରେ ଅଭାବନୀୟ ଘଟଣା। ମହାନଦୀରେ ବୁଡି ୨ଜଣ ନାବାଳକଙ୍କ ମୃତ୍ୟୁ ହୋଇଯାଇଛି। ଗତ ଶୁକ୍ରବାର ଅପରାହ୍ନରେ ତିୱାରୀଗଳି ନିବାସୀ ନାବାଳକ ହିମାଂଶୁ ସିଂହ କୁଶୱାହା ଓ କନିଷ୍କ ଖେଳିବା ପାଇଁ ଯାଇଥିଲେ। ଅନ୍ୟ ସାଥିଙ୍କ ସହିତ ସେମାନେ ମହାନଦୀ ତଟରେ ଥିବା ବଡବଜାର ସଡକ ଘାଟ ଠାରେ ପହଞ୍ଚି ଗାଧୋଇବା ପାଇଁ ନଦୀ ମଧ୍ୟକୁ ଯାଇ ମହାନଦୀର ଖରସ୍ରୋତରେ ଭାସି ଯାଇଥିଲେ। ନାବାଳକଙ୍କୁ ନଦୀରେ ବହି ଯାଇଥିବାର ଦେଖି ତୁରନ୍ତ ସେମାନଙ୍କୁ ଊର୍ଦ୍ଧ୍ବାର କରିବା ପାଇଁ ସ୍ଥାନୀୟ ବାସିନ୍ଦା ପ୍ରୟାସ କରିଥିଲେ। ହେଲେ ସଫଳ ନହେବାରୁ ତୁରନ୍ତ ସ୍ଥାନୀୟ ପୁଲିସ ସହିତ ଅଗ୍ନିଶମ ବିଭାଗକୁ ଖବର ଦେଇଥିଲେ। ଫଳରେ ଅଗ୍ନିଶମ ଓ ପୁଲିସ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟରେ ଲାଗିଥିଲେ। ବିଳମ୍ବିତ ରାତ୍ରି ପର୍ଯ୍ୟନ୍ତ ସେମାନଙ୍କୁ ମହାନଦୀ ଗର୍ଭରେ ଖୋଜିବା ସତ୍ୱେ ସେମାନଙ୍କର କୌଣସି ପତ୍ତା ମିଳିନଥିଲା। ଶନିବାର ସକାଳ ସମୟରେ ଓଡ୍ରାଫ୍ଟ ଓ ଅଗ୍ନିଶମ ଦଳ ପୁନର୍ବାର ଖୋଜିବା ପରେ ଘଟଣାସ୍ଥଳରୁ ପ୍ରାୟ ଅଧ କି.ମି ଦୂରରେ ଥିବା ସମଲେଶ୍ୱରୀ ମନ୍ଦିର ଘାଟ ନିକଟରେ କନିଷ୍କ ଓ ହିମାଂଶୁଙ୍କ ମୃତଦେହ ମିଳିଥିଲା। ନାବାଳକ ମାନେ ନିଖୋଜ ହେବାର ଖବର ମିଳିବା ପରେ ସେମାନଙ୍କ ପରିବାର ଲୋକେ ମହାନଦୀ ତଟରେ ରହିଥିଲେ। ଉଭୟଙ୍କ ମୃତଦେହ ମିଳିବାରୁ ଅଞ୍ଚଳରେ ଶୋକାକୂଳ ପରିବେଶ ସୃଷ୍ଟି ହୋଇଥିଲା।
Popular Categories
Previous article
Next article