ଆଠଗଡ଼: ପ୍ରବଳ ଜନସମାଗମ ସତ୍ତ୍ୱେ ଆଠଗଡ଼ରେ ବିଜୟା ଦଶମୀ ସୌହାର୍ଦ୍ଦ୍ୟପୂର୍ଣ୍ଣ ଓ ଶାନ୍ତିପୂର୍ଣ୍ଣ ଭାବେ ଅନୁଷ୍ଠିତ ହୋଇଯାଇଛି। ପାଗ ଅନୁକୂଳ ଥିବାରୁ ସନ୍ଧ୍ୟାରୁ ବିଳମ୍ବିତ ରାତି ପର୍ଯ୍ୟନ୍ତ ଆଠଗଡ଼ ଓ କନ୍ତୋଲ ଅଞ୍ଚଳରେ ପ୍ରାୟ ୫୦ ହଜାର ଲୋକଙ୍କ ସମାଗମ ହୋଇଥିବାବେଳେ ଭିଡ ନିୟନ୍ତ୍ରଣ ପାଇଁ ପୁଲିସ ପକ୍ଷରୁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଥିଲା। ପୁରା ସହର ରଙ୍ଗୀନ ଆଲୋକମାଳା ଓ ଆଲୋକ ତୋରଣରେ ଝଲସୁଥିଲା। ଆଠଗଡ଼ ସହରର ସମସ୍ତ ପ୍ରମୁଖ ବଜାର ଗୁଡିକରେ ଦଶହରା ପୂର୍ବ ସନ୍ଧ୍ୟାରୁ ରାତି ୧୨ଟା ପର୍ଯ୍ୟନ୍ତ ସାଂସ୍କୃତିକ ତଥା ମନୋରଞ୍ଜନ କାର୍ଯ୍ୟକ୍ରମ ଆୟୋଜନ କରାଯାଇଥିଲା। ସେହିପରି ସ୍ଥାୟୀ ଦୋକାନ ସାଙ୍ଗକୁ ଭଳିକି ଭଳି ଅସ୍ଥାୟୀ ଦୋକାନରେ ଘରକରଣା ସାମଗ୍ରୀ ଓ ଖାଦ୍ୟ ପଦାର୍ଥ ବିକ୍ରିବଟା ବହୁ ଉତ୍ସାହଜନକ ହୋଇଥିବାରୁ ବ୍ୟବସାୟୀ ମାନେ ବେଶ ଖୁସି ହୋଇଛନ୍ତି।
ଆଠଗଡ଼ର ଦୁର୍ଗାବଜାର, ଜଗନ୍ନାଥ ବଜାର, ରଘୁନାଥ ବଜାର, ସ୍ବପ୍ନେଶ୍ବର ବଜାର, ଲକ୍ଷ୍ମୀ ବଜାର, ଚାନ୍ଦବାଲି ଛକ ବଜାର ଓ ବୀରକିଶୋରପୁର ବଜାରରେ ପୂଜା ମଣ୍ଡପରେ ମେଢ ଦେଖିବାକୁ ବହୁ ଜନ ସମାଗମ ହୋଇଥିଲା। ପ୍ରସ୍ତୁତି ବୈଠକର ସମସ୍ତ ନିଷ୍ପତ୍ତି ପ୍ରାୟତଃ କାର୍ଯ୍ୟକାରୀ ହୋଇଥିବାରୁ ଆଠଗଡ଼ ଦଶହରା ଶାନ୍ତିପୂର୍ଣ୍ଣ ଭାବେ ସମ୍ପନ୍ନ ହୋଇଥିଲା। ସୋମବାର କେବଳ ରାସରସିକପୁର ସାହିର ଦୁର୍ଗା ମେଢ ବିସର୍ଜନ ହୋଇଥିବାବେଳେ ଆସନ୍ତା ୧୬ ତାରିଖ ବୁଧବାର ଦିନ ଆଠଗଡ଼ର ସମସ୍ତ ପ୍ରମୁଖ ବଜାରର ଭସାଣି ଉତ୍ସବ ସାମୁହିକ ଭାବେ ହେବ।
Comments are closed.