ଚଳନ୍ତା ଅଟୋରୁ ଡେଇଁ ପଡ଼ିଲା କୁମ୍ଭୀର, ନାକେଦମ ହେଲେ ବନ କର୍ମଚାରୀ

ସମାଜ ଡିଜିଟାଲ ଡେସ୍କ: ମଧ୍ୟପ୍ରଦେଶରେ ପ୍ରବଳ ବର୍ଷା ଯୋଗୁ କୁମ୍ଭୀର ନଦୀରୁ ବାହାର ଜନବସତିକୁ ଚାଲିଆସୁଛନ୍ତି। ଏଥିଯୋଗୁ ଅନେକ ଅଞ୍ଚଳରେ ଲୋକଙ୍କ ମଧ୍ୟରେ ଭୟର ବାତାବରଣ ଲାଗି ରହିଛି। ରାଜ୍ୟର ଶୋପୁର ଅଞ୍ଚଳରୁ ଗୁରୁବାର ଏକ କୁମ୍ଭୀର ଉଦ୍ଧାର କରାଯାଇଥିଲା। କୁମ୍ଭୀରଟି ଜନବସତିକୁ ଚାଲିଆସିଥିଲା। ଲୋକମାନେ ଏ ନେଇ ବନ ବିଭାଗକୁ ଖବର ଦେଇଥିଲେ। ଫଳରେ ବନ କର୍ମଚାରୀ ପହଞ୍ଚି କୁମ୍ଭୀରକୁ ଉଦ୍ଧାର କରି ଏକ ଇ-ରିକ୍ସାରେ ଆଣି ନଦୀରେ ଛାଡ଼ିବାକୁ ନେଉଥିଲେ। ହେଲେ ବିଜୟପୁର ନିକଟରେ ମଝି ରାସ୍ତାରେ କୁମ୍ଭୀରଟି ଅଟୋରୁ ଡେଇଁପଡ଼ିଥିଲା। ମାତ୍ର ବନ୍ଧାଯାଇଥିବାରୁ କୁଆଡେ ଯାଇପାରି ନ ଥିଲା। ହେଲେ ପାଖରେ କୌଣସି ସରଞ୍ଜାମ ନ ଥିବାରୁ ବନ କର୍ମଚାରୀମାନେ କୁମ୍ଭୀରଟିକୁ ପୁନର୍ବାର କାବୁ କରିବାରେ ନାକେଦମ ହୋଇଥିଲେ। କିଛି ସମୟ ପରେ କର୍ମଚାରୀମାନେ ତା’କୁ କାବୁ କରି ଗନ୍ତବ୍ୟ ସ୍ଥଳକୁ ଯାଇଥିଲେ। ଏହାର ଏକ ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ ହେଉଛି।

A video from #Sheopur, #MadhyaPradesh, has gone viral, showing a crocodile jumping out of a moving e-rickshaw pic.twitter.com/fmsOsw326z

— The Times Of India (@timesofindia) September 13, 2024