ଯାତ୍ରା କଳାକାରଙ୍କୁ ମଞ୍ଚରେ ଠିଆ ଗୋଇଠା, ଦେଖନ୍ତୁ ଭିଡିଓ

ସମ୍ବଲପୁର: ଚାଲିଥିଲା ଯାତ୍ରା, କିନ୍ତୁ ହଠାତ୍ ଏକ ଦୃଶ୍ୟକୁ ନେଇ ତାତିଗଲେ ଦର୍ଶକ। ମଞ୍ଚ ଉପରକୁ ଚଢି କଳାକାରଙ୍କୁ ଠିଆ ଗୋଇଠା ମାରିବା ସହ କରିଥିଲେ ଭଙ୍ଗାରୁଜା। ଏମିତି ଅଭାବନୀୟ ଘଟଣା ଘଟିଛି ସମ୍ବଲପୁର ଜିଲା ଧନୁପାଲି ଥାନା ଅନ୍ତର୍ଗତ ନକ୍ସାପାଲିଠାରେ। ଧାର୍ମିକ ଭାବନାକୁ ଆଘାତ ପହଞ୍ଚାଇବା ଅଭିଯୋଗରେ ଦର୍ଶକ ଯାତ୍ରା ମଞ୍ଚକୁ ଚଢ଼ି ଭଙ୍ଗାରୁଜା କରିବା ସହ କଳାକାରଙ୍କୁ ଆକ୍ରମଣ କରିଛନ୍ତି, ଯାହାର ଭିଡିଓ ଏବେ ଭାଇରାଲ ହୋଇଛି।

ଯାତ୍ରାମଞ୍ଚରେ ରିୟଲ୍ ଫାଇଟ୍, ସ୍କିପ୍ ନ କରି ସମ୍ପୂର୍ଣ୍ଣ ଭିଡିଓ ଦେଖନ୍ତୁ ……#Jatra #Odisha #Samajalive pic.twitter.com/Ex3e5VLlDY

— Samaja Live (@samajalive) September 12, 2024

ମଙ୍ଗଳବାର ରାତିରେ ସ୍ବର୍ଣ୍ଣ ମହଲ ଯାତ୍ରା ପାର୍ଟି ପକ୍ଷରୁ ‘ସ୍ବାମୀ ପାଇଁ ପଛେ ନର୍କକୁ ଯିବି’ ନାଟକ ମଞ୍ଚସ୍ଥ ହୋଇଥିଲା। ଏଥିରେ ରହିଥିବା ଏକ ଧର୍ମାନ୍ତରୀକରଣ ଦୃଶ୍ୟକୁ ନେଇ ଦେଖା ଦେଇଥିଲା ବିବାଦ। ଏଥିରେ ଜଣେ ହିନ୍ଦୁ ବ୍ୟକ୍ତିଙ୍କୁ ଗୋ ମାଂସ ଖୁଆଇବା ଦୃଶ୍ୟ ପ୍ରଦର୍ଶିତ ହୋଇଥିଲା। ଏହା ହିନ୍ଦୁ ଧାର୍ମିକ ଭାବନାକୁ ଆଘାତ ଦେଇଥିବା ଅଭିଯୋଗ କରି ଜଣେ ଦର୍ଶକ ଉତ୍ତ୍ୟକ୍ତ ହୋଇ ସିଧା ମଞ୍ଚ ଉପରକୁ ଚଢ଼ି ଯାଇ କଳାକାରଙ୍କୁ ଠିଆ ଗୋଇଠା ମାରିଥିଲେ। ଅନ୍ୟ ଦର୍ଶକମାନେ ମଧ୍ୟ ଚୌକି ଆଦି ଫିଙ୍ଗା ଫୋପଡ଼ା ତଥା ମଞ୍ଚ ଭଙ୍ଗାରୁଜା କରିଥିଲେ। ଫଳରେ କିଛି ସମୟ ପାଇଁ ସେଠାରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇ ସାମୟିକ ଭାବେ ନାଟକଟି ବନ୍ଦ ରହିଥିଲା। ପରେ ସ୍ଥାନୀୟ ଲୋକେ ଏଥିରେ ହସ୍ତକ୍ଷେପ କରି ଉତ୍ୟକ୍ତ ଦର୍ଶକଙ୍କୁ ବୁଝାସୁଝା କରିବାରୁ ସ୍ଥିତି ସ୍ଵାଭାବିକ ହୋଇଥିଲା। ଏହାପରେ ନାଟକଟି ପୁଣି ଆରମ୍ଭ ହୋଇଥିଲା। କିନ୍ତୁ ଏହି ନାଟକରେ ହିନ୍ଦୁ ବ୍ୟକ୍ତିଙ୍କୁ ଗୋ ମାଂସ ଖୁଆଇବା ଦୃଶ୍ୟକୁ କାଟି ଦିଆଯାଇଥିଲା। ତେବେ ଅନ୍ୟ କୌଣସି ସ୍ଥାନରେ ମଞ୍ଚସ୍ଥ ହେଉଥିବାବେଳେ ଏହି ନାଟକରେ ହିନ୍ଦୁ ଭାବନା ବିରୋଧୀ ଦୃଶ୍ୟ ରହିଲେ ପରିସ୍ଥିତି ଭୟାବହ ହେବ ବୋଲି ଦର୍ଶକ ଜଣକ ଚେତାବନୀ ଦେଇଛନ୍ତି।