ଓଡ଼ିଶା ସମାଜବାଦୀ ପାର୍ଟି ତରଫରୁ ୧୫ଶ ଅର୍ଥ କମିଶନକୁ ସ୍ମାରକପତ୍ର

ଭୁବନେଶ୍ୱର : ସମାଜବାଦୀ ପାର୍ଟି ଓଡ଼ିଶା ରାଜ୍ୟ କମିଟିର ଏକ ୫ଜଣିଆ ପ୍ରତିନିଧି ଦଳ ମଙ୍ଗଳବାର ରାଜ୍ୟ ପାର୍ଟି ସଭାପତି ରବି ବେହେରାଙ୍କ ନେତୃତ୍ୱରେ ପଞ୍ଚଦଶ ଅର୍ଥ କମିଶନକୁ ଭେଟି ୧୧ ଦଫା ସମ୍ବଳିତ ଦାବିପତ୍ର ପ୍ରଦାନ କରିଛନ୍ତି। ଓଡ଼ିଶାରେ ଏକ ଆର୍ଟିଫିସିଆଲ ଇଣ୍ଟେଲିଜେନ୍ସ ପ୍ରତିଷ୍ଠା ପାଇଁ ସ୍ୱତନ୍ତ୍ର ଅନୁଦାନ ଯୋଗାଇଦେବା, ରାଜ୍ୟରେ କୃଷି ଭିତ୍ତିଭୂମି ବିକାଶ ପାଇଁ ପର୍ଯ୍ୟାପ୍ତ ପାଣ୍ଠି ଯୋଗାଣ ଏବଂ ବିଶୁଦ୍ଧ ପାନୀୟଜଳ ପାଇଁ ସ୍ୱତନ୍ତ୍ର ଅନୁଦାନ, ପାଣିପାଗ ପରିବର୍ତ୍ତନକୁ ପ୍ରତିହତ କରିବା ପାଇଁ ବ୍ୟାପକ ବୃକ୍ଷ୍ୟରୋପଣ ଏବଂ ଏ ଦିଗରେ ଯୁବ ରେଡକ୍ରସ ଓ କଲେଜ ବିଶ୍ୱବିଦ୍ୟାଳୟ ଏନ୍‍.ଏସ୍‍.ଏସ୍‍ ଭଲ୍ୟୁଣ୍ଟିୟର ମାଧ୍ୟମରେ ପରିବେଶ ସୁରକ୍ଷା ପାଇଁ ବ୍ୟାପକ କାର୍ଯ୍ୟକ୍ରମ ଗ୍ରହଣ କରିବାକୁ ଦଳ ଦାବି କରିଛି। ପଞ୍ଚାୟତିରାଜ ଅନୁଷ୍ଠାନ ଗୁଡିକୁ ସ୍ୱତନ୍ତ୍ର ପାଣ୍ଠି ଦେବା ସହିତ ନୂତନ ଭିତ୍ତିଭୂମି ବିକାଶରେ ସେମାନଙ୍କୁ ଟିକସ ଧାର୍ଯ୍ୟକରିବା କ୍ଷମତା ଦେବାକୁ ଦଳ ଦାବି କରିଛି। ଏହିଭଳି ଅନେକ ସମସ୍ୟାର ସମାଧାନ ପାଇଁ ଦାବିପତ୍ରରେ ଉଲ୍ଲେଖ ରହିଛି। ଏହି ସ୍ମାରକପତ୍ର ପ୍ରଦାନରେ ରାଜ୍ୟ ସମ୍ପାଦକ ସୁଦର୍ଶନ ପ୍ରଧାନ, ଯୁବନେତା ସମ୍ବିତ ଦାସ, ପ୍ରଦୀପ ମିଶ୍ର ସାମିଲ ଥିଲେ।