ଡେସ୍କ: କୋଇଲା ଓ ଖଣି ମନ୍ତ୍ରୀ ଜି କିଶନ ରେଡ୍ଡୀ ଆଜି କହିଛନ୍ତି ଯେ ସାରା ଦେଶରେ କୋଇଲା ଖଣିଗୁଡ଼ିକର ଘରୋଇକରଣ ପାଇଁ ସରକାରଙ୍କର କୌଣସି ଯୋଜନା ନାହିଁ। ଲୋକସଭାରେ ପ୍ରଶ୍ନକାଳରେ ସେ କହିଛନ୍ତି, ତେଲେଙ୍ଗାନାର ସିଙ୍ଗାରେନି କୋଇଲା ଖଣିର ଘରୋଇକରଣ ପାଇଁ କୌଣସି ଯୋଜନା ନାହିଁ। ସିଙ୍ଗାରେନି କୋଇଲା ଖଣିକୁ ସୁଦୃଢ଼ କରିବାକୁ ସରକାର ଚାହୁଁଥିବା ବେଳେ ସିଙ୍ଗରେନି କୋଇଲା ଖଣିର ୫୧ ପ୍ରତିଶତ ଅଂଶଧନ ରାଜ୍ୟ ସରକାରଙ୍କ ହାତରେ ଥିବା ବେଳେ ୪୯ ପ୍ରତିଶତ ଅଂଶଧନ କେନ୍ଦ୍ର ସରକାରଙ୍କ ଅଧୀନରେ ରହିଛି।
କୋଇଲା କ୍ଷେତ୍ରରେ ସ୍ୱଚ୍ଛତା ଆଣିବା ପାଇଁ ନିଆଯାଇଥିବା ପଦକ୍ଷେପ ଉପରେ ଆଲୋକପାତ କରିଶ୍ରୀ ରେଡ୍ଡୀ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ କୋଇଲା ଖଣି ଆବଣ୍ଟନ ଉପରେ ଏକ ନୂତନ ନୀତି ଅଣାଯାଇଛି ଯାହା ଏହି କ୍ଷେତ୍ରରେ ସ୍ୱଚ୍ଛତା ଆଣିବା ଉଦ୍ଦେଶ୍ୟରେ ଅଣାଯାଇଛି। କୋଲ୍ ଇଣ୍ଡିଆ ଲିମିଟେଡ୍ ଅଧୀନରେ ବର୍ତ୍ତମାନ ସୁଦ୍ଧା ୩୨୨ଟି କୋଇଲା ଖଣି କାର୍ଯ୍ୟକ୍ଷମ ଥିବା ବେଳେ ଦେଶରେ ୫୪ଟି ବାଣିଜ୍ୟିକ ଓ କ୍ୟାପ୍ଟିଭ୍ ଖଣି କାର୍ଯ୍ୟକରୁଛି। ଦେଶରେ କୋଇଲାର କୌଣସି ଅଭାବ ନାହିଁ ବୋଲି ସେ ସୂଚନା ଦେଇଛନ୍ତି। ଆମଦାନୀ କୋଇଲା ଉପରେ ନିର୍ଭରଶୀଳତା ହ୍ରାସ କରିବାକୁ ସରକାର ପ୍ରତିଶ୍ରୁତିବଦ୍ଧ ଏବଂ ଚାହିଦା ଅନୁଯାୟୀ କୋଇଲା ଯୋଗାଣ ପାଇଁ ପ୍ରସ୍ତୁତ ଅଛନ୍ତି ବୋଲି ମନ୍ତ୍ରୀ କହିଛନ୍ତି।
