କଲ୍ୟାଣସିଂହପୁର: ରାୟଗଡ଼ା ଜିଲା କଲ୍ୟାଣସିଂହପୁର ବ୍ଲକ ପୂଜାରୀଗୁଡା ପଞ୍ଚାୟତର ଡିବାଲପାଡୁ ଓ ଡିମ୍ବିରିବାଡି ଦୁଇଟି ଗାଁ ଲୋକେ ମିଶି କେନାଲ ମରାମତି କରୁଥିବା ଦେଖିବାକୁ ମିଳିଛି। ବାରମ୍ବାର ବ୍ଲକ ପ୍ରଶାସନ ଓ ଜିଲା ପ୍ରଶାସନକୁ କେନାଲ ମରାମତି ନିମନ୍ତେ ଅଭିଯୋଗ କରିଥିଲେ ମଧ୍ୟ କୌଣସି କାର୍ଯ୍ୟ ନ ହେବା ଯୋଗୁଁ ଦୁଇ ଗ୍ରାମବାସୀ ଏକତ୍ରିତ ହୋଇ ଚାଷ ଜମିକୁ ପାଣି ମଡ଼ାଇବା ପାଇଁ କେନାଲ ମରାମତି କରିଛନ୍ତି। ଉକ୍ତ କେନାଲଟି ବ୍ଲକ ତରଫରୁ କରାଯାଇଥିଲା। ବହୁ ବର୍ଷ ବିତି ଯାଇଥିଲେସୁଦ୍ଧା କେନାଲ ମରାମତି କରାଯାଇନାହିଁ। କେନାଲ ଭାଙ୍ଗିଯାଇଥିବା ସହ କେନାଲଟି ମାଟି ବାଲିରେ ପୋତି ହୋଇଥିଲା। ଯାହା ଫଳରେ ସେହି କେନାଲରେ ଯେତେ ପାଣି ଆସିଲେ ମଧ୍ୟ ଚାଷ ଜମିକୁ ପାଣି ଆସୁ ନ ଥିବା ଯୋଗୁଁ ଦୁଇ ଗ୍ରାମବାସୀ ଏକତ୍ରିତ ହୋଇ ପତି ହୋଇଥିବା କେନାଲର ମାଟି ବାଲିକୁ ବାହାର କରୁଥିବାର ଦୃଶ୍ୟ ଦେଖିବାକୁ ମିଳିଛି । କାନସୁ ହିକକା, ଲଦ ହିକକା, ରାମିୟା ହିକକା, ରାମଦାସ ହିକକା, ଏନ ଜନାର୍ଦ୍ଦନ ରାଓ, ଜନ ହିକକା, ଡମ୍ବରୁ ହିକକା, ରାମାରାଓ ହିକକା, ଡ୍ରିକା ହିକକା ପ୍ରମୁଖ ଉପସ୍ଥିତ ରହି ପୋତି ହୋଇଥିବା କେନାଲରୁ ମାଟି ବାଲି ବାହାର କରୁଥିବା ନଜରକୁ ଆସିଛି। ବର୍ତ୍ତମାନ ଚାଷ ସମୟ, ବିଲକୁ ପାଣି ନ ଆସିଲେ କିପରି ଚାଷ କରି ପରିବାର ଭରଣ ପୋଷଣ କରିବା ସହ ସାହୁକାର ଓ ବ୍ୟାଙ୍କରୁ ଆଣିଥିବା ଋଣ ପରିଶୋଧ କରିବୁ ବୋଲି କହିଛନ୍ତି।
Comments are closed.