ଗୁରୁଡିଝାଟିଆ: ପୁରୁଣା କଟକ-ସମ୍ବଲପୁର ରାସ୍ତାର ନୂଆପାଟଣାଠାରୁ ଆଠଗଡ ପର୍ଯ୍ୟନ୍ତ ରାସ୍ତା ପ୍ରଶସ୍ତୀକରଣ ସହିତ ଉନ୍ନତିକରଣ କାର୍ଯ୍ୟ ଜାରି ରହିଛି। ଅନେକ ସ୍ଥାନରେ ରାସ୍ତା କାର୍ଯ୍ୟ ସରିଯାଇଥିବା ବେଳେ କେତେକ ସ୍ଥାନରେ ଏବେ ବି ଠିକାଦାରଙ୍କ ଉଦାସୀନତା ଓ ସ୍ଥାଣୁତା ପାଇଁ କାମ ସରିନାହିଁ। କିନ୍ତୁ ଯେଉଁଠି ସରିଛି ସେଠାରେ ନିମ୍ନମାନର କାର୍ଯ୍ୟ ହୋଇଥିବା ଅଭିଯୋଗ ହୋଇଛି। ଏହାର ଏକ ଉଦାହରଣ ଦେଖିବାକୁ ମିଳିଛି କଖଡି ସରକାରୀ ଉଚ୍ଚ ବିଦ୍ୟାଳୟଠାରୁ ମହାଳପଡା ପନ୍ଥେଇ ପର୍ଯ୍ୟନ୍ତ ରାସ୍ତାରେ। ନିର୍ମାଣର ୬ ମାସ ନ ବିତୁଣୁ ଏହି ରାସ୍ତା ଦବିବା ଆରମ୍ଭ ହେଲାଣି।
ଉକ୍ତ ରାସ୍ତା ପ୍ରଶସ୍ତୀକରଣ ହେବାର ୬ମାସ ପୂରଣ ହୋଇ ନ ଥିବା ବେଳେ ରାସ୍ତା ଦବି ଫାଟିଗଲାଣି। ଏହାକୁ ନେଇ ସାଧାରଣରେ ତୀବ୍ର ଅସନ୍ତୋଷ ସୃଷ୍ଟି ହୋଇଛି । ବିଶେଷକରି ରାସ୍ତା ନିର୍ମାଣ କରୁଥବା ଠିକା ସଂସ୍ଥା ଠିକ୍ ଢଙ୍ଗରେ ମାଟି ପକାଇ ଉଚ୍ଚା କରି ସାରିବା ପରେ ସୁଦୃଢ ବା ମଜବୁତ୍ ନ କରି ତା ଉପରେ ପିଚୁ କାର୍ଯ୍ୟ କରିବା ଫଳରେ ଏଭଳି ଅବସ୍ଥା ଦେଖାଦେଇଛି ବୋଲି ସ୍ଥାନୀୟ ଲୋକେ କହିଛନ୍ତି। ବିଭାଗୀୟ ଯନ୍ତ୍ରୀମାନେ ରାସ୍ତାକାର୍ଯ୍ୟ ଠିକ ଭାବେ ତଦାରଖ କରୁ ନ ଥିବାରୁ ଏଭଳି ଅବସ୍ଥା ସୃଷ୍ଟି ହୋଇଛି ବୋଲି ଅଞ୍ଚଳବାସୀ ଅଭିଯୋଗ କରୁଛନ୍ତି। ତୁରନ୍ତ ଏହାକୁ ଅନୁଧ୍ୟାନ କରି ନିମ୍ନମାନର କାର୍ଯ୍ୟ କରୁଥିବା ଠିକା ସଂସ୍ଥା ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସାଧାରଣରେ ଦାବି ହୋଇଛି । ଏ ସଂପର୍କରେ ବିଭାଗୀୟ ଯନ୍ତ୍ରୀ ପ୍ରଭାତ କୁମାର ବେହେରାଙ୍କୁ ପଚାରିବାରୁ ସେ କହିଥିଲେ, ଏହାର ଅନୁଧ୍ୟାନ କରାଯାଇ ତଦନ୍ତ କରାଯିବ।
Comments are closed.