ଭବାନୀପାଟଣା: ଆଷାଢ଼ ଶୁକ୍ଳ ଦ୍ଵିତୀୟା ତିଥିରେ ଏଠାରେ ମହା ସମାରୋହ ତଥା ଶାନ୍ତି ଶୃଙ୍ଖଳାର ସହ ରଥଯାତ୍ରା ପାଳିତ ହୋଇଛି। ସକାଳେ ସ୍ଥାନୀୟ ଜଗନ୍ନାଥ ମନ୍ଦିର ଏବଂ ବାଲାଜୀ ମନ୍ଦିରରେ ରଥ ପ୍ରତିଷ୍ଠା ପରେ ନେତ୍ରୋତ୍ସବ ଏବଂ ନବଯୌବନ ଦର୍ଶନ ପର୍ବ ବିଧି ମତେ ଅନୁଷ୍ଠିତ ହେଇଥିଲା। ପରେ ସେବାୟତ ମାନେ ବୈଦିକ ରୀତିରେ ପୂଜାର୍ଚ୍ଚନା କରିବା ପରେ ଜଗନ୍ନାଥ ମନ୍ଦିର ରଥରେ କଳାହାଣ୍ଡି ରାଜା ଅନନ୍ତ ପ୍ରତାପ ଦେଓ ଛେରା ପହଁରା କରିଥିଲେ। ପରେ ପରେ ଚତୁର୍ଦ୍ଧା ମୂର୍ତ୍ତୀ ରଥାରୂଢ଼ ହେବାପରେ ଘଣ୍ଟ ଶଙ୍ଖ ହୁଳହୁଳି ଏବଂ ଭକ୍ତ ମାନଂକ ହରିବୋଲ ଧ୍ଵନୀ ମଧ୍ୟରେ ରଥଟଣା ଆରମ୍ଭ ହେଇଥିଲା। ଜଗନ୍ନାଥ ମନ୍ଦିରର ରଥ ମାଣିକେଶ୍ଵରୀ ମନ୍ଦିର ନିକଟରେ ରହିବେ। ପରମ୍ପରା ଅନୁଯାୟୀ ଆଜି ତିନି ଠାକୁରଙ୍କୁ ମାଉସୀମା ମନ୍ଦିରକୁ ନିଆଯିବ। ସେହିଭଳି ବାଲାଜୀ ମନ୍ଦିରରେ ଚତୁର୍ଦ୍ଧା ମୂର୍ତ୍ତିଙ୍କୁ ବିଧିମତେ ପୂଜାର୍ଚ୍ଚନା ପରେ ରାଜପରିବାର ସଦସ୍ୟ ଭାରତ ଦେଓ ଛେରା ପହଁରା କରିଥିଲେ। ଏଠାରେ ଅପରାହ୍ନ ୬ଟାରେ ରଥଟଣା ଆରମ୍ଭ ହେଇ ରାତି ୮ଟା ସୁଦ୍ଧା ଜେଲଖାନା ଛକ ନିକଟ ମାଉସୀ ମା ମନ୍ଦିର ନିକଟରେ ପହଞ୍ଚିଥିଲେ। ସହରରେ ଦୁଇ ପ୍ରମୁଖ ରଥ ସହିତ ପୁରୁଣା ପଡ଼ା, ଇରିଗେଶନ କଲୋନୀ, ରାମ ସାଗର ପଡ଼ା, ଅର୍କା ବାହିଲି ପଡ଼ା, ମଦନ ମୋହନ ପଡ଼ା ପ୍ରଭୃତି ସ୍ଥାନରେ ମଧ୍ୟ ଭାବ ଭକ୍ତି, ହର୍ଷ ଉଲ୍ଲାସ ମଧ୍ୟରେ ରଥଯାତ୍ରା ପାଳିତ ହୋଇଛି।
Comments are closed.