ଗୁଳୁଦିପଶି, ସଅଁରାପଶିରେ ରଜବତୀ ବିବାହ ଉତ୍ସବ

ପାଟଣା: ରଜବିଦା ଅବସରରେ କେନ୍ଦୁଝର ଜିଲାର ପାଟଣା ବ୍ଲକ ଅନ୍ତର୍ଗତ ଗୁଳୁଦିପଶି ଏବଂ ସଅଁରାପଶି ଗ୍ରାମରେ ରଜବତୀ ବିବାହ ଉତ୍ସବ ଅନୁଷ୍ଠିତ ହୋଇଯାଇଛି। ଗୁଳୁଦିପଶି ଗ୍ରାମରେ ସାତ ଦିନିଆ ରଜ ମହୋତ୍ସବର ଗୁରୁବାର ବିଦାୟ ଦିବସରେ ସମସ୍ତ ମା’ ଭଉଣୀ ଏକତ୍ରିତ ହୋଇ ଐତିହାସିକ ପ୍ରଥା ଅନୁଯାୟୀ ରଜବତୀ ବିବାହ ଉତ୍ସବ ପାଳନ କରିଥିଲେ। ଗୋଟିଏ ଝିଅକୁ ବର ବେଶରେ ସଜେଇ ଗାଁ ଗାଁ ବୁଲାଇବା ସହ ଡିଜେ ବାଣ ଫୁଟାଇ କନ୍ୟା ଘରକୁ ମା’ ଭଉଣୀମାନେ ଯାଇ କନ୍ୟାକୁ ଆଣି ସ୍ଵତନ୍ତ୍ର ବିବାହ ଭଳି ଉଭୟ ଝିଅ ପୁଅକୁ ରଜବତୀ ବିବାହ ବନ୍ଧନରେ ବାନ୍ଧିଥିଲେ। ମା’ ଭଉଣୀମାନେ ହାତ ଧରା ଧରି ହୋଇ ରଜ ଦୋଳି ସହ ଗୀତ ତାଳେତାଳେ ସବରୀ ନାଟ କରିଥିଲେ।

ସେହିପରି ସଅଁରାପଶି ଗ୍ରାମରେ ୧୪ତାରିଖରୁ ୭ଦିନ ଧରି ରଜ ପର୍ବ ପାଳିତ ହୋଇଥିବା ବେଳେ ଗୁରୁବାର ଶେଷ ଦିନରେ ରଜବତୀ ବିବାହ କାର୍ଯ୍ୟ ସମ୍ପନ୍ନ ହୋଇଥିଲା। କୁମାରୀ ଓ ମହିଳାମାନେ ରଜବିଧି ଅନୁଯାୟୀ ଦୁଇଜଣଙ୍କୁ ବର କନ୍ୟା ସଜାଇ ରୀତିନୀତି ଅନୁସାରେ ବିବାହ କରିଥିଲେ।