ଲାଞ୍ଜିଗଡ: ଲାଞ୍ଜିଗଡ ବ୍ଲକ ବିଜେପୁର ଥାନା ଅନ୍ତର୍ଗତ ସାହାଜପଡା ଗ୍ରାମରେ ଏକ ନାବାଳକର ନାଳରେ ବୁଡି ମୃତ୍ୟୁ ଘଟିଛି। ସୂଚନାନୁସାରେ ରାୟଗଡାର ପଦ୍ମନାଭ ସାହୁ ଏବଂ ତାଙ୍କ ଜ୍ୱାଇଁ ରାୟଗଡା ଜିଲ୍ଲା ହାଟ ମୁନିଗୁଡାର ଜୟସେନ ସାହୁକାର ତାଙ୍କ ପରିବାର ସହିତ କୌଣସି କାର୍ଯ୍ୟକ୍ରମରେ ଯୋଗ ଦେବା ପାଇଁ ବିଜେପୁର ଥାନା ଅନ୍ତର୍ଗତ ସାହାଜପଡା ଗ୍ରାମକୁ ବନ୍ଧୁ ଘରକୁ ଆସିଥିଲେ। ଅପରାହ୍ନ ସମୟରେ ଜୟସେନ ସାହୁକାରଙ୍କ ପୁଅ ଦିବାକର ସାହୁକାର (୧୨) ବର୍ଷ ସାହାଜପଡା ଗାଁ ନିକଟସ୍ଥ କଲ୍ୟାଣୀ ନଦୀକୁ ଶୌଚ ହେବାପାଇଁ ଯାଇଥିବା ବେଳେ ଫେରିବା ବିଳମ୍ବ ହୋଇଥିବା ଯୋଗୁଁ ପରିବାର ଲୋକେ ଖୋଜିବାକୁ ଯାଇଥିଲେ। ଖୋଜାଖୋଜି କରିବା ପରେ ଦିବାକର ନଦୀ ପାଣିରେ ବୁଡି ମୃତ୍ୟୁବରଣ କରିଥିବା ଦେଖିବାକୁ ପାଇଥିଲେ। ଏହାପରେ ମୃତ ଦିବାକରର ଅଜା ବିଜେପୁର ଥାନାରେ ଏକ ଲିଖିତ ଅଭିଯୋଗ କରିଥିଲେ। ଖବରପାଇ ବିଜେପୁର ଥାନାଧିକାରୀ ରଘୁନାଥ ମାଝୀଙ୍କ ନେତୃତ୍ୱରେ ପୋଲିସ ଟିମ ଘଟଣାସ୍ଥଳରେ ପହଞ୍ଚି ଶବ ଜବତ କରିବା ସହିତ ତଦନ୍ତ କରିଥିଲେ। ଏହାପରେ ବେଦାନ୍ତ ଅମ୍ବୁଲାନ୍ସ ଯୋଗେ ଶବ ବ୍ୟବଛେଦ ପାଇଁ ଲାଞ୍ଜିଗଡ ପଠାଇଥିଲେ। ରାତ୍ର ହୋଇଯାଇଥିବା ଯୋଗୁଁ ଆଜି ଶବ ବ୍ୟବଛେଦ କରାଯିବ ବୋଲି ଲାଞ୍ଜିଗଡ ମେଡିକାଲ ଅଫିସର ଭବାନୀ ଶଙ୍କର ଲେଙ୍କା ପ୍ରକାଶ କରିଛନ୍ତି।
Comments are closed.