ନୂଆଦିଲ୍ଲୀ: ମଦ ଦୁର୍ନୀତି ମାମଲାରେ ଗିରଫ ହୋଇ ତିହାର ଜେଲ୍ରେ ଥିବା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରୱାଲଙ୍କୁ ସୁପ୍ରିମକୋର୍ଟ ଶୁକ୍ରବାର ଅନ୍ତରୀଣ ଜାମିନ ଦେବା ପରେ ଏହାକୁ ନେଇ ଇଣ୍ଡିଆ ବ୍ଲକ ଦୁଇଭାଗରେ ବିଭକ୍ତ ହୋଇଛି। ନିର୍ବାଚନୀ ପ୍ରଚାର ପାଇଁ ସୁପ୍ରିମକୋର୍ଟ କେଜ୍ରିୱାଲଙ୍କ ଆବେଦନ ଉପରେ ଶୁଣାଣି କରି ଜୁନ ୧ ପର୍ଯ୍ୟନ୍ତ ଜାମିନ ଦେଇଥିବାରୁ ଇଣ୍ଡିଆ ବ୍ଲକର ବହୁ ସଦସ୍ୟ ସ୍ବାଗତ କରିଛନ୍ତି। କିନ୍ତୁ ଅନ୍ୟତମ ସଦସ୍ୟ ତଥା କଂଗ୍ରେସ ନେତା ସନ୍ଦୀପ ଦିକ୍ଷିତ କେଜ୍ରିୱାଲଙ୍କ ଜାମିନକୁ ନେଇ ପ୍ରଶ୍ନ କରିଛନ୍ତି।
ସନ୍ଦୀପ ଚିନ୍ତା ପ୍ରକଟ କରି କହିଛନ୍ତି, ଏପରି କୋହଳତା ସମସ୍ତଙ୍କ ପାଇଁ ଲାଗୁ ହେବା ଉଚିତ। ଯଦି କେଜ୍ରିୱାଲଙ୍କୁ ଜାମିନ ଦିଆଯାଇପାରୁଛି, ତେବେ ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ବି ଜାମିନ ଦିଆଯିବା ଉଚିତ। ଏହି ନିୟମ ସମସ୍ତଙ୍କ କ୍ଷେତ୍ରରେ ଲାଗୁ କରାଯିବା ଉଚିତ। କେବଳ କେଜ୍ରିୱାଲ କାହିଁକି ? ହେମନ୍ତ ସୋରେନଙ୍କୁ ବି ଜାମିନ ଦିଆଯିବା ଉଚିତ।
ଏହି ପ୍ରସଙ୍ଗରେ ନିଜର ପ୍ରତିକ୍ରିୟା ଦେଇ ସନ୍ଦୀପ ରାଜନେତାଙ୍କୁ ଜେଲରେ ଦୀର୍ଘ ଦିନ ପର୍ଯ୍ୟନ୍ତ ଅଟକ ରଖାଯିବାକୁ ସମାଲୋଚନା କରିଥିଲେ। ଏହା ଅନ୍ୟାୟ ବୋଲି ସେ କହିଛନ୍ତି। ଜାମିନ ଦେବା କ୍ଷେତ୍ରରେ ଏପରି ବିଭେଦ କରିବା ଅନୁଚିତ। ଯଦି ଜଣେ ନେତାଙ୍କୁ ଜାମିନ ଦିଆଯାଉଛି, ତା’ହେଲେ ଅନ୍ୟ ଜଣେ ନେତାଙ୍କୁ ବି ସମାନ ନ୍ୟାୟ ମିଳିବା ଉଚିତ।
Comments are closed.